Ena ika26 ni Epereli 2023, e tauca e dua na lewa bibi na matanitu o Sipeni me baleta na saumi ivakacavacava. E yaga vei ira na tacida na lewa qori ena rua na sala.

Kena imatai, ena sega ni lavaki na isoqosoqo me sauma na ivakacavacava me baleta na vale kece e vakayagataki ena noda sokalou. Ena sega tale ga ni lavaki vei ira na cau ina isoqosoqo mera sauma na kena ivakacavacava. E laurai tale ga ena lewa e tau qo, nira sa “kilai mera dua na lotu” na iVakadinadina i Jiova, me vaka e tukuni ena Mataveilewai ni Dodonu ni Lewenivanua e Urope.

E vakalawataki na noda cakacaka na iVakadinadina i Jiova e Sipeni ena June 2006, ia e lavaki meda sauma na ivakacavacava. E sega ni caka qori vei ira na vo ni isoqosoqo vakalotu e Sipeni. E sega ni vakadonui na nodra kerea vakavica na tacida me veisautaki na lawa qori. Ia e sega ni namaki nona kerea e dua na tabana ni matanitu me ratou gole yani eso na tacida mai na valenivolavola ni tabana e Sipeni ina dua na bose ena ika24 ni Epereli 2023. E tukuni ena bose ni sa vakarau veisautaki na lawa me baleta na saumi ivakacavacava, ena yaga tale ga vei ira na iVakadinadina i Jiova. E pasitaki na lawa qori ena ika26 ni Epereli, ni oti ga e rua na siga. Ena tekivu muri na lawa qori ena June 2023.

Eda marautaka na veisau qo ni tokona na nodra dodonu ni sokalou na tacida e Sipeni.—Filipai 1:7.