Ena gauna ni matedewa qo, era volaivola na mataveitacini mera vakayaloqaqataki ira eso tale. Rau volaivola o Brother Josué Laporta kei watina vei ira na cakacaka e valenibula kei ira na tauvi COVID-19 e Barcelona, Sipeni. E mani volavola lesu vei rau e dua na nasi. E vakadonuya me tabaki na nona ivola, me caka tale ga kina eso na veiveisau me rawa ni matata. a

Au dua na nasi . . . au volavola tiko yani ena vukui [sa boko na yacana], e dua na marama sa yabaki 97. Au wilika tiko vua ena mataka nikua na nomudrau ivola. E dau tiko na gauna me kau kina na ivola vei ira na tauvimate, ia au kila ni sega ni yaco mai vakacalaka na nomudrau ivola. E vakavuna me rau kila kina e rua, [o tauvimate] kei au . . . , ni tiko na inuinui. Sa tauvimate bibi sara o [tauvimate], e qai tukuna vei au ni vinakata me tarogi iko Josué ena dua na taro ni bera ni takali: “Au sa yabaki 97, ia ena rawa ni yaga tale ga vei au na ka e yalataki tu ena iVolatabu?”

Au vakayagataka e tini na miniti ena mataka nikua meu wilika kina vei [koya] na ka drau dusimaki keirau kina ena website. E tarai koya dina, e laurai sara ga e matana na marau kei na vakacegu. A sega ni va tu qori eliu. Keirau sa qai sarava na vidio “Na Cava a Mate Kina o Jisu?”

Au wilika tale ga na mekesini, [“Yadra!”] me baleta na lomaocaoca. E vukei au meu vosota na ituvaki dredre eda sotava tiko qo. E sega ni rawarawa dina.

E sega ni dua e tu eke me vakayaloqaqataki keimami na veiqaravi e valenibula, ia na ivakasala drau vola mai qo ena tu ga ena veigauna. Keimami na dau vakasamataka vakatitobu. Ni oti ga qo na matedewa, au na via kila e levu tale na ka mai na iVolatabu. Au nuitaka ni drau na tu vakarau tale ga ni vakavulici au ena ka au se bera ni kila me baleta na inuinui ni vuravura vou. E sega ni tukuni rawa na levu ni noqu vakavinavinakataka na Kalou ni yaco mai na ivola ena gauna sara ga au cakacaka tiko kina. E rawa kina niu lai wilika vei [tauvimate].

Au nuitaka ni drau bulabula vinaka tiko vakavuvale. Au kila tale ga ni drau vosota rawa tiko na ituvaki qo ni tiko na nomudrau inuinui ni vakatauvatani kei keimami na kena vo. Vinaka vakalevu sara na nomudrau solia na nomudrau gauna mo drau vukea kina eso tale me vakataki [tauvimate] kei au. Tou sega ni veikilai, ia drau vakavuna me keirau vakila tale na marau ni oti e dua na gauna dede.

Vinaka vakalevu.

Na vosa ni vakavinavinaka va qori, e uqeti keda meda vunautaka tiko ga na itukutuku vinaka ena gauna ni matedewa qo. Meda kerea mada ga vei Jiova me vu ni veivakayaloqaqataki na vosa eda vakayagataka ena cakacaka vakavunau.—Vosa Vakaibalebale 15:23.