Ena ika27 ni Me 2023, e sevutaka o Brother Jaroslav Sekela, e lewe ni Komiti ni Tabana e Czech-Slovak, na ivola The Bible—The Book of Matthew ena vosa vakaRomany (Tokalau kei Slovakia). E sevutaki ena dua na soqo ena tauni o Michalovce ena tokalau kei Slovakia. Era yadua na kena ilavelave na tiko ena soqo, qai rawa ni download ena iyaya vakalivaliva.

E veivolekati na vosa vakaRomany kei na vosa vakaBengali, vakaIdia kei na vosa vakaPunjabi. E levu na vosa vakaRomany e kau mai na vanua era toki kina na matatamata era vakatokai na Roma. E tiko gona eso na ka e duidui kina na vosa vakaRomany ena tokalau kei Slovakia. Era vakasamataka tiko qori na daunivakadewa ni vakarautaki tiko na ivola i Maciu.

Sa tiko rawa e dua na iVolatabu vakaRomany (Tokalau kei Slovakia), ia e sosomitaka na yaca i Jiova na icavuti me vaka na o Raj se o Del, e kena ibalebale “Turaga” se “Kalou.” Kena ikuri, e vakamacalataki ga eso na tikinivolatabu, e sega gona ni kilai na ibalebale ni vosa a volai taumada kina. E tiko ena ivola i Maciu e se qai vakadewataki qo na yaca i Jiova qai matata na vosa e vakayagataki kina.

E kaya e dua vei ratou na daunivakadewa: “Ni vakadewataki na iVolatabu, e bibi me donu na noda vakadewataka na nona itukutuku na Kalou, me rawa nira mai kilai koya qai lomani koya eso tale.”

E kaya e dua tale na daunivakadewa: “Era dau vakaduiduitaki vakalevu na Roma, ena vakayaloqaqataki ira gona na Maciu 10:31. E tukuni kina ni o Jiova e kauaitaki ira mada ga na siparo, era dau raici tu mera ka wale ena gauna vakaivolatabu. Ia eda talei sara mai vei ira na siparo.”

Eda vakadeitaka ni na vukei ira na lewenivanua na ivola vou qo mera vulica na levu ni nona lomani ira qai kauaitaki ira o Jiova.—1 Pita 5:7.