Ena ika18 ni Tiseba, 2021, e sevutaki na itabataba vakavoutaki na New World Translation of the Holy Scriptures ena vosa vakaSlovenia. E sevutaka o Brother Gerrit Lösch, e lewe ni iLawalawa Dauvakatulewa, ni katoni na kena porokaramu ra qai sarava e 2,000 na lewenivanua. E sevutaki ena iyaya vakalivaliva, ena qai veisoliyaki na ilavelave ena 2022.

Me tekivu mai 1584, sa tekivu vakadewataki na iVolatabu vakaSlovenia. A sevutaki ena yabaki ya na Dalmatin Bible, na imatai ni iVolatabu vakaSlovenia. Me yacova mai qo e kilai ni tiko e 80 ga na itabataba ni Dalmatin Bible, wili kina e dua na ilavelave e tiko ena vanua e dau maroroi kina na iVolatabu ena itikotiko liu ni iVakadinadina i Jiova e Warwick, e Niu Yoka mai Merika.

Ena 1925, e tekivu vunau o Brother Franz Brand ena vale ni veikoti e cakacaka tiko kina ena siti o Maribor e Slovenia. E dua vei ira na International Bible Student (Gonevuli ni iVolatabu e Vuravura). Ena yabaki tale ga qori era tekivu soqoni e dua na iwasewase lailai mera veivosakitaka na iVolatabu. Ena 1930, era tekivu tara na Gonevuli ni iVolatabu e dua na ofisi me tokona na cakacaka i kea. E gauna marautaki dina vei ira na mataveitacini na yabaki 2009, ni a sevutaka kina o Brother Samuel Herd e lewe ni iLawalawa Dauvakatulewa na New World Translation, ena dua na soqo a vakayacori ena siti o Ljubljana e Slovenia.

Ena iKarua ni iValu Levu kei na vica tale na yabaki tarava, era tusaqati na iVakadinadina i Jiova e Slovenia, vei ira na Nazi kei na vakailesilesi ni matanitu. Ena gauna qori eso na tacida era vesu, eso tale era vakamatei. Ena 1953, sa qai malumu mai na ituvaki. Era vakadonui vakalawa na iVakadinadina i Jiova mera sokalou ena galala. Nikua sa 1,757 na dautukutuku e Slovenia.

Eda nuidei nira na duavata na tacida e Slovenia kei na ka e tukuna o Brother Lösch ni sevutaka na iVolatabu: “Ni vakayagataka sara vakamaqosa na iVolatabu qo, moni vukei ira kina eso tale mera vakila na kena kaukaua! . . . Me vukei kemuni mada ga moni taura matua “na vosa dina!”—Taito 1:9.