COLOMBO, Sri Lanka—A sisi na qele ena veikorokoro ena veiulunivanua o Aranayaka, Sri Lanka, rauta na 100 na kilomita mai na koroturaga o Colombo. Era mate kina e sivia na 100 na lewenivanua, e vakacaca tale ga ena nodra itikotiko e rauta na le 350,000. Ni bera na sisi ni qele, sa tekivu taubi tu na uca ena yasayasa ya ena ika15 ni Me. Ena dua mada ga na tauni o Kilinochchi, e rauta ni 15 na idi na levu ni wai ni tau tu ga na uca me 24 na aua. Era tukuna na vakailesilesi ni ca sara na waluvu e tarai Sri Lanka qo ni vakatauvatani kei na cabe ni ualoka ena 2004.

E tukuna na valenivolavola ni iVakadinadina i Jiova e Sri Lanka ni sega ni mate e dua na iVakadinadina, era tokitaki ga e rauta ni le 200. E curuma tale ga na wai e dua na nodra Vale ni Soqoni na iVakadinadina se vanua ni sokalou e Kaduwela, rauta ni 15 na kilomita mai Colombo.

Sega ni bera na kena duri e dua na komiti ni vakacoko me qarava na veika vakayago kei na veika vakayalo era vinakata o ira na vakaleqai ena waluvu. A vakayagataki e dua na Vale ni Soqoni e Kotahena me maroroi kina na wai, isulu, kei na wainimate. Era bole e vica vata na drau na iVakadinadina mera veisoliyaka na iyaya ni veivuke vei ira na nodra lewenilotu kei ira era tiko veitikivi.

Ni vosa ena vukudra na iVakadinadina i Jiova e Sri Lanka o Nidhu David, e kaya: “Keimami nanumi ira ena masu na vuvale era vakaleqai ena leqa tubukoso qo. Keimami veivuke tale ga ena samaki ni vale, veisoliyaki ni kakana kei na isulu vei ira na vakaleqai. Na yalo ni veiqaravi kei na nodra lomasoli na neimami lewenilotu e vaka ga na rarama ni cina ena dua na vanua buto.”

Gusunivosa:

Veiyasa i vuravura: David A. Semonian, Valenivolavola ni iTukutuku, 1-718-560-5000

Sri Lanka: Nidhu David, 94-11-2930-444