Tekivu ena imatai ni Janueri 2000, e kaya na matanitu o Suwiteni me veitokoni vakailavo ena isoqosoqo ni lotu me salavata kei na lawa e vauca nodra tokoni na veimatalotu ena itikotiko. Ena tokoni ga vakailavo na isoqosoqo lotu e “uqeti ira na lewenivanua ena vakabauta kei na ivakavuvuli mera veiyaloni, cakacaka vata, ra qai cakava e levu na cakacaka vinaka ena itikotiko.”

Me tekivu ena 2007, e tokona tiko e levu na lotu o Suwiteni. Ia e sega vakadua ni tokoni ira na iVakadinadina i Jiova, qai vakalewa noda vakabauta vakalotu nida dau tawaveitovaki.

Ena vuku ni veivakaduiduitaki qori, era kerea kina vakatolu na tacida ina mataveilewai me raica vakatautauvata na matanitu o Suwiteni na veimatalotu. Ena gauna kece qori, e vakaraitaka na Mataveilewai Levu ina matanitu o Suwiteni ni okati me basulawa na ka e cakava ena noda isoqosoqo, e dodonu gona me dikevi tale.

Ena ika24 ni Okotova, 2019, e veisautaka na matanitu o Suwiteni nona vakatulewa. E dikeva ni dodonu mera tokoni vakailavo na iVakadinadina i Jiova baleta na ka kece “era cakava e yavutaki ena lawa.

E dau tokona tale ga vakailavo na matanitu o Norway na isoqosoqo kece ni lotu, wili kina na iVakadinadina i Jiova. Ia ena vica na vula sa oti, e dikeva tale na Matanitu na veitokoni vakailavo e cakava tiko vei ira na iVakadinadina i Jiova, baleta nira dau tawaveitovaki. Era mani vakarautaka na tacida na itukutuku dina vei ira na vakailesilesi e Norway, me baleta noda tawaveitovaki. Era solia tale ga na itukutuku ni vakatulewa ni Mataveilewai Cecere e Suwiteni, kei na itukutuku e vakarautaka na matanitu o Jamani kei Itali ena nodra tokoni na iVakadinadina i Jiova.

Eda marau nira vakatulewataka ena ika18 ni Noveba, 2019 na vakailesilesi e Norway nira sa tokoni vakailavo na iVakadinadina i Jiova. Qo na ka era vola: “Na veidigidigi e nona dodonu e dua na lewenivanua e Norway, ia e sega ni vakaro. Era sega ni dau cakava qori na iVakadinadina i Jiova me salavata kei na nodra vakabauta, . . . ia e raica na matanitu ni nodra sega ni vakaitavi ena politiki na iVakadinadina i Jiova, qori na yavu mera kua ni tokoni kina vakailavo ena matanitu.”

Ena vuku ni vakatulewa qori, sa qai tukuna o Brother Dag-Erik Kristoffersen, e lewe ni Komiti ni Tabana e Scandinavia: “Dua na ka neimami marau ni sa qai kila na matanitu nida dau caka vinaka ena itikotiko. Eda nuitaka nira na muria tale ga na vo ni veimatanitu na vakatulewa qo.” Io eda vakavinavinaka vakalevu vua na Vunilawa Cecere o Jiova.—Aisea 33:22.