Ena imatai ni Janueri 2022, me ika75 ni yabaki ni kena tabaki na imatai ni Watchtower ena vosa vakaTailadi.

Ena 1931, e tekivu vunautaki na itukutuku vinaka e Tailadi. Ratou solia na tacida ena cakacaka vakavunau e vica vata na udolu na ivola vakaivolatabu ena vosa vakaJaina, vosa vakavalagi, kei na vosa vakaJapani. Gauna ya, se vakadewataki ga ena vosa vakaTailadi na ivola lailai na Protection.

Me rawa ni tara na lomadra na lewenivanua na ka dina, ratou nanuma e tolu na tacida tagane painia ratou veiqaravi tiko e kea, me so tale na ivola vakaivolatabu ena vosa vakaTailadi. E mani volavola sara o Brother Willi Unglaube vei Brother Rutherford me vakaraitaka vua na nodratou nanuma. E volavola lesu o Brother Rutherford, qai kaya: “Dou nuitaki Jiova qai cakacaka vakaukaua, dou na kunea e dua na daunivakadewa.”

Ena Tiseba 1939, rau vunau tiko o Brother Kurt Gruber, kei Brother Willi Unglaube ena vualiku kei Tailadi. Rau sotava sara e dua na marama o Chomchai Inthaphan, e qasenivuli liu tiko ena koronivuli na Presbyterian Girls School, e Chiang Mai. Rau solia sara vua e dua na ivola vakaivolatabu ena vosa vakavalagi. E kila vinaka o Chomchai na vosa vakavalagi, kei na vosa vakaTailadi. E vakadeitaka sara ga ena ivola qori ni sa kunea na ka dina.

Toso na gauna, e kere vakacegu mai na nona cakacaka o Chomchai, e biuta tale ga na lotu a lewena tu. Dina ni levu era tusaqati koya, ratou kaya tale ga na tabana ni vuli ni na tubu na kena isau, ia e sega ni soro e papitaiso sara me iVakadinadina i Jiova. Ratou qai kerei koya na tacida me vakadewataka na ivola na Salvation. O Chomchai e imatai ni lewenivuvale e Peceli e Bangkok, qai veiqaravi tu ena tabana ni vakadewa me vica vata na yabaki. Toso na gauna, era mai kila na ka dina e levu na yalewa, ra veivuke tale ga ena vakadewa.

E cegu tu na vakadewa ni tekivu na iKarua ni iValu Levu, ia e tomani tale ni oti na ivalu. E vakadewataki ena vosa vakaTailadi na Watchtower ni Janueri 1947, e tabaki tale ga e 200 na kena ilavelave ena vale ni daukaulotu ni vakayagataki na misini na mimeograph. E vakayagataki tiko ga na iwalewale ni tabaivola qori me yacova na 1952, qai tabaki e veivula e 500 na kena ilavelave. Oti qori era vakayagataka sara na tacida e dua na kabani ni tabaivola me tabaka na mekesini. Ena Seviteba 1993, sa tekivu tabaki e Japani na Watchtower kei na Awake! ena vosa vakaTailadi, qai veisoliyaki e veiyasa i vuravura.

Nikua, era veivuke tiko e rauta ni 80 na tacida ena tabana ni vakadewa ena valenivolavola ni tabana e Tailadi, kei na rua na valenivolavola ni vakadewa tu yawa. Sa vakadewataki tale ga na Watchtower ena vosa vaka-Akha, vakaLahu, vakaLaotian, kei na vosa vagalu ni Tailadi.

Era vakavinavinakataki Jiova e sivia na 5,000 na dautukutuku era tiko ena yalava e qarava na valenivolavola ni tabana e Tailadi, ni sa vakadewataki na Watchtower ena nodra vosa.—Vosa Vakaibalebale 10:22.