E tekivu ena 2019 na tarataravaki kei na vakavinakataki ni valenivolavola ni tabana e Tailadi. Era veivuke kina na tacida e Tailadi kei na le 50 era gole yani e vanuatani. Ia ni tekivu na matedewa na COVID-19, era lesu ena nodra vanua e 42 na tacida qori. Ni laveti na vakatatabu ni matedewa, e tekivu tale na tarataravaki. Era vakavulici tale ga eso na tacida mera veivuke ena cakacaka. E mai vakaoti na tarataravaki ena ika30 ni Epereli 2023.

Rau veivuke tale ga kina o Brother Setthasat Tawansirikul kei watina o Waraporn. Rau lomaleqataka ni sega ni levu na ka rau kila. E kaya o Setthasat: “Keirau qai lai vulica e levu sara na ka ena gauna keirau tarataravaki kina.”

Era vakila na tacida era bolecakacaka na marau kei na vakacegu, qori e uqeti ira mera lai veivuke ena so tale na tabana. Eso era veivuke ena tarataravaki ena yalava e qarava na valenivolavola ni tabana o Tailadi. E dua na tacida yalewa e sa lai tiko ena vuli ni Koronivuli ni iTalatala ni Matanitu ni Kalou. Eso tale era sa veiqaravi tiko e Peceli. E dua vei ira o Brother Rapeepat Woradetsakul, e kaya: “Au vakila na veivuke i Jiova ena gauna ni tarataravaki. Qori e vakayaloqaqataki au meu ciqoma na veisureti meu veiqaravi e Peceli. Au vakadeitaka ni na tokoni au o Jiova ena noqu ilesilesi vou.”

E okati ena tarataravaki na kena vakavinakataki na nodra icili na lewe i Peceli e Tailadi, na ofisi, na tabavale me baleta na tarataravaki qai maroroi kina na iyaya, kei na ikelekele ni motoka. E voli tale ga e ono na tabavale volekata na valenivolavola ni tabana. E vakavinakataki qori mera tiko kina na lewe i Peceli.

Eda marau vata kei ira na tacida era yalorawarawa mera veiqaravi qai vakadinadinataka na ka e tukuni ena Same 34:8: “Tovolea mada qai raica ni vinaka o Jiova.”