Ena imatai ni Tiseba 2019 ina ika31 ni Janueri 2020, era cakacaka vakavunau lavotaki e Tailadi na tacida mai na 11 na matanitu era lewena na ivavakoso, kei na iwasewase lalai ena vosa vakaTailadi. E tuvanaki na vunau qori mera lai tokoni kina e rauta ni 4,800 na tacida era vosa vakaTailadi, mera vunau tale ga vei ira na lewenivanua era vosa vakaTailadi era tiko ena veivanua e Bangkok. E sivia ni 600 na dautukutuku era veitokoni, era vakayagataka e 34,625 na aua, era solia e 32,718 na ivola, era vakaraitaka e 6,637 na vidio, e tauyavu tale ga e 310 na vuli iVolatabu.

Qo na ikarua ni gauna me vakayacori kina na cakacaka vakavunau lavotaki e Tailadi. Na kena imatai a caka ena rua na yabaki sa oti ena Tiseba 2018 ina Janueri 2019. Oti na imatai ni cakacaka vakavunau lavotaki, e kaya o Brother Plakorn Pestanyee, e lewe ni Komiti ni Tabana e Tailadi: “Keimami sega sara ga ni namaka na iwiliwili ni vuli iVolatabu era tauyavu, kei na nodra uqeti na lewe ni ivavakoso.” Ya na vuna e tuvanaka kina na valenivolavola ni tabana me vakayacori na kena ikarua.

Eso vei ira na tacida era gole qo, era tosoya tale nodra tiko mera vukea kina e levu mera mai kilai Jiova. Rau tuvanaka e dua na veiwatini mai Korea me rau tiko tale me dua na vula. Ni rau kunea e levu na tataleitaki, rau vinakata me rau tiko tale me rua na macawa. E dua tale na tacida yalewa mai Korea e cegu mai na nona cakacaka me vakaitavi ena vunau qo, e vinakata me sa toki i Tailadi.

E vuavuaivinaka nodra lai vunau na tacida. Rau sotava e dua na veitinani iVakadinadina i Jiova, e dua na yalewa ena nona vanua ni cakacaka. Rau solia sara vua na Yadra! Nb. 2, 2019, e kena ulutaga “Ono na ka Mera Vulica na Gone.” Ena nodrau veisiko e tarava, sa yalovaka tiko mai na marama qo na Yadra! rau se qai solia ga vua. E kaya: “E wananavu sara ga na ivola qo! Kerekere, au via kila eso tale na ka.” Rau mani tuvanaka na tacida me ratou vuli vakadua e veimacawa ena gauna ni vakasigalevu. Rau vukei koya tale ga me download nona JW Library. Gauna qo sa vuli tiko vakarua ena dua na macawa. E dau marautaka tale ga me vakaraitaka na vidio me vaka na droini yavala vei rau na luvena.

Dua tale na tacida e sotava e dua na marama e dau qoroya noda isulusulu vinaka, kei na noda dau veikauaitaki. E kaya na marama qori ni sa lakova e vica vata na lotu me vaqara itokani, ia e sega ni raica e dua. E mani sureti koya sara na tacida me soqoni ena siga tiko ga qori. E qai gole yani ena soqoni, e marautaka tale ga nona lai veikilai kei ira na tacida e duidui nodra isususu kei na vanua era gole mai kina. E vulica sara na iVolatabu ena brochure iTukutuku Vinaka Mai Vua na Kalou! E sega vakadua ni via calata na soqoni.

E dua na tacida yalewa e sotava e dua na marama yabaki 50 e Bang Na, e dua na yasana e Bangkok. E kaya na marama qori ni dau lai lotu, ia e sega tu na nona iVolatabu. E mani vukei koya na tacida yalewa me download nona JW Library, kei na New World Translation of the Holy Scriptures. Ni lesuvi koya tale na tacida yalewa, e kaya na marama ya ni sa wilika tiko na iVolatabu ena JW Library se qai download ga. E mani vakaraitaka vua o tacida yalewa na taro ena daku ni brochure iTukutuku Vinaka, qai wilika yadudua vua. E kaya na marama ya ni via kila kece na kena isau. Tekivu sara na vuli, gauna qo sa vuli tiko kei na dua na tacida yalewa ekea. Dua na ka nona vakavinavinakataka vakalevu na marama ya na nona vuli, ni se qai vakadua me cakava ga vakataki koya na nona vakekeli ena ka vakayalo.

A vunau tiko e veivale e dua na tacida yalewa, mani sotava e dua na turaga ni Tailadi, kei na watina mai Lao. E tarogi rau sara se cava e bibi duadua ena nodrau bula. Erau kaya na “Vuvale.” Mani vakamacalataka vei rau na tacida yalewa na ulutaga me baleta na vuvale ena brochure iTukutuku Vinaka Mai Vua na Kalou! Rau kaya na veiwatini ni yaga vakalevu na ivakasala ya, rau mani vakadonuya me rau vulica na iVolatabu. Rau gole sara ena soqoni. Rau kaya ni rau marautaka vakalevu, ni levu na veikauaitaki. Rau na sega tale ga ni via calata.

Na irogo qo e Tailadi kei na levu tale, e vakaraitaka nira ‘vakaitavi tiko ga vakalevu ena cakacaka ni turaga’ na tamata i Jiova ena iotioti ni veisiga qo.—1 Korinica 15:58.