BANGKOK—Sa tolu qo na yabaki nodra vakayagataka tiko na vakailesilesi vakamatanitu e Tailadi na ivola ni iVakadinadina i Jiova. Qori me veivuke ena nodra vakavulici na vakailesilesi ena so na ulutaga e vauca na bula raraba ni lewenivanua. Kena ivakaraitaki, na iwalewale ni veisusu, tarovi ni ivalavala kaukaua e vale, kei na so tale na ivalavala e rawa ni vakaleqa na vakasama kei na bula vakayago.

Na vuli e vakarautaka na matanitu e taketetaki sara ga kina na itikotiko, qai vakayacori na vuli ena sivia na 8,700 na vanua vakarautaki e Tailadi taucoko. E tuvanaka tale ga na matanitu e dua na porokaramu ni vuli e vakatokai na Community Development Learning Centers (CDLC). Na vuli qori e vakayacori ena 11 na vanua e Tailadi ra qai vakavulici kina o ira era veiliutaki ena itikotiko. E dairekita ni CDLC ena yasana o Nayok ena vuaicake kei Bangkok o Chaiwat Saengsri, e duri toka e lomadonu ena itaba e cake. E kaya o Chaiwat: “Dua na ka noqu qoroya na inaki ni nodra cakacaka na iVakadinadina, oya mera vukei ira na lewenivanua mera kila vinaka na Dauveibuli. E va tale ga qori na inaki ni neitou sasaga, me vakatorocaketaki na itikotiko, me rawa ni toso cake na ivakatagedegede ni bula qai vakilai na vakacegu.” E tomana o Chaiwat: “Kena ivakaraitaki, e [vakamacalataki] ena mekesini na Yadra! na ulutaga ‘Qarauna na Vosa Mosimosi.’ Qori e dua na ka e via vakavulici ira tale ga kina na veiliutaki ena itikotiko, na tabana ni matanitu e qarava na bula raraba ni lewenivanua kei na veitaqomaki. Keitou raica ni yaga vakalevu na ulutaga ya ena neitou veivakavulici.” A sureti ira na iVakadinadina o Mr. Chaiwat mera kauta yani na nodra ivola ina dua na vuli e vakarautaki me baleta na veiliutaki kei na veivakatorocaketaki ena itikotiko. Era tiko ena vuli qori e le 100 era veiliutaki ena itikotiko, kei na le 20 na dauveivakavulici mai na 28 na yasana. Erau taba toka e cake kei Mr. Chaiwat e rua na iVakadinadina i Jiova.

E kaya o Anthony Petratyotin na nodra gusunivosa na iVakadinadina i Jiova e Tailadi: “Keimami marau nira vakayagataka vinaka tiko na vakailesilesi na ivakasala vakaivolatabu ena neimami ivola. Keimami na vakarautaka tiko ga vei ira na neimami ivola, keimami na veisoliyaka tale ga ena neimami cakacaka vakavunau.”

Gusunivosa:

Veiyasa i vuravura: David A. Semonian, Valenivolavola ni iTukutuku, +1-845-524-3000

Tailadi: Anthony Petratyotin, +66-2-375-2200