Ena ika24 ni Feperueri 2021, e tukuna o Nury Turkel na komisina ni Matabose e Raica na Galala ni Lotu e Veiyasa i Vuravura (USCIRF), a ni na kerea me sereki mai valeniveivesu na tacida tagane o Brother Shamil Khakimov, e yabaki 70. E kaya oTurkel: “Tekivu mai na 2019, e vakararawataki tu mai na turaga itabaqase tautauvimate qo ena valeniveivesu e osodrigi, ni totogitaki vakatawadodonu me vesu me vitu veimama na yabaki. Ena rawa sara ga ni vakamatei koya na ka e caka qori. E beitaki vakailasu ena vuku ni nona vakabauta ni dua na iVakadinadina i Jiova.”

Sa mate na wati Brother Khakimov. Na tacida tagane qo e dua vei ira na le 24 na tacida ena vualiku kei Tajikistan era vakatarogi ena Janueri kei na Feperueri ni 2019, vei ira na vakailesilesi ni tabana e vakalailaitaka na basulawa na Department of Organized Crime Control (DOCC). Era vesuki Brother Khakimov ra qai vakatarogi koya me baleta na isoqosoqo, kei na nona mai dua na iVakadinadina i Jiova.

E vesu tu o Brother Khakimov me walu na aua, e sega tale ga ni vakadonui me laurai vakavuniwai ni se qai sele oti ga. E dau tauvi koya tale ga na tubunidra. Nira kauti koya i vale na ovisa era taura nona iyaya vakalivaliva, iVolatabu, eso noda ivola kei na nona pasipote. Ni sa sega nona pasipote, sa na sega tale ga ni rawa ni taura nona peniseni me sauma kina nona qaravi vakavuniwai.

Ena ika28 ni Feperueri 2019, e vakataulewataka e dua na turaganilewa ena Khujand City Court me vesu o Brother Khakimov qai wawa veilewai. E vakatolu nona tosoya na mataveilewai na dede ni nona wawa veilewai tiko i loma. E vesu tiko ga ena gauna kece e caka tiko kina na veivaqaqai kei na veilewai.

Ena ika10 ni Seviteba 2019, e tukuni ni cala qai totogitaki me vitu veimama na yabaki e valeniveivesu. Ia ena ika4 ni Julai 2020, e kaya na vakailesilesi ni valeniveivesu vei Brother Khakimov ni na muri na lawa e Tajikistan (amnesty law) ena kena itotogi. Ya ena vakalailaitaki me rua na yabaki, tolu na vula qai tini na siga nona vesu. E namaki me sere ena ika16 ni Me 2024.

Eda kila ni o Jiova ena tokoni ira tiko ga na tacida me rawa nira vosota qai marau tiko ga.—Same 20:2.