Ena vakarau tauca * na mataveilewai e Tajik mai Esia e Loma, na lewa me baleti Brother Rustamjon Norov. Ena rawa ni vesu me lima na yabaki e valeniveivesu ni sega ni via vakaitavi ena ivalu ena vuku ni nona vakabauta. A vesu ena imatai ni Okotova 2020, qai wawa veilewai tiko ena gauna qo.

Rustamjon Norov

• Sucu: 1998 (Dushanbe)

• Kena italanoa: Dau vakavinakataka na vale, e vakavoutaka tale ga na iyaya ni vale me qaravi ratou kina nona vuvale. E taleitaka na qito soka

• E papitaiso ena 2016 ni se qai yabaki 17. Oti e rua na yabaki e toki ena yalava e vosa vakaTajik

Ena 2016, e gole o Brother Rustamjon Norov ena ofisi ni mataivalu. E lai vakamacalataka kina ni tawaveitovaki, e kerea tale ga me cakava e dua na cakacaka me kua kina ni vakaitavi ena ivalu. A cakava tale qori ena 2017. E doka qai qoroya e dua na komada ni mataivalu na veika e tukuna o Brother Norov. Ena tolu na yabaki e tarava, e sega ni kacivi tale me lai vakatarogi.

Ia ena ika24 ni Seviteba 2020, e kacivi o Brother Norov me gole ina ofisi ni mataivalu. Era vakatarogi koya na vakailesilesi me tolu na aua, ra kaya tale ga ni ganiti koya me vakaitavi ena ivalu. Era mani vakasaurarataki koya me laurai vakavuniwai. E raica tu o Batyr na tamana na veika e caka vua, mani kerei ira na vakailesilesi me ratou raica na dauveibeitaki na kisi nei luvena.

Ena imatai ni Okotova, rau gole sara o Brother Norov kei tamana ena nodra ofisi na dauveibeitaki. Ra mani kaya na dauveibeitaki me rau gole ina ofisi ni mataivalu. Ni rau yaco yani e sega ni vakadonui me curu i loma o Batyr. E mani vesu tu vakawawa o Brother Norov me rua na siga. E sega mada ga ni beitaki ni daubasulawa. Era sega tale ga ni vakadonuya na vakailesilesi me vosa vei nona loya.

Ena ika3 ni Okotova, e tokitaki o Brother Norov ena keba ni mataivalu ena siti o Khujand. E rauta ni 300 na kilomita na kena yawa e nodratou vale e Dushanbe. Oti e rua na siga, e tokitaki ena so tale na keba ni mataivalu e Khujand.

Ena ika6 ni Okotova, e vakadonui me qiriti ratou nona vuvale, e sikovi koya tale ga na nona loya. Ena ika17 ni Okotova, e vakataulewataka na mataveilewai e Tajik me vesu tu vakawawa. Ena gauna vata qori ratou tomana tiko na dauveibeitaki nodratou veivaqaqai, me yacova na gauna e vakataulewa kina na mataveilewai. E beitaki o Brother Norov ni lasutaka tiko nona itukutuku vakavuniwai me kua kina ni vakaitavi ena ivalu.

E sega vakadua ni vakayalolailaitaki Brother Norov na ituvaki qori, e nuitaki Jiova ga vakatabakidua. E vakavinavinakataki Jiova ni vukei koya me dei ena vakabauta, me yaloqaqa tale ga ni vakatovolei. E vakavinavinakataka tale ga na veika tawanamaki e sotava ena 2013. Oya nodrau kau vakaukaua kei na tacina o Ravshan vei ira na vakailesilesi me rau laurai vakavuniwai ena ofisi ni mataivalu. Gauna qori sa yabaki 15 tiko kina o Brother Norov, sa dautukutuku bera ni papitaiso tale ga. E se sega tale ga ni ganiti koya me curu ena mataivalu. Oti na ka e yaco qori, e vakayagataka vakalevu nona gauna ena sokalou vakavuvale o Batyr na tamadrau, me vukei rau na luvena me rau tawaveitovaki tiko ga. Ena vakatovotovotaka o Batyr me dua na ovisa, rau na vakatovotovotaka tale ga na cauravou na sala me rau dei kina ena nodrau vakabauta.

E kaya o Brother Norov: “Ni bera ni keitou sokalou vakavuvale, au dau nanuma tu ni sa dei noqu vakabauta. Ia ni vakatasuasuataki, au taqaya qai rere vakalevu. Au qai liaca ni vinakati meu masu wasoma, meu vulica vagumatua tale ga na veika me baleti Jiova me rawa ni qaqaco kina noqu vakabauti koya, qai tawaveitovaki tiko ga. Qori e dua na sala e vukei au meu yaloqaqa. Au mani yalataki au vei Jiova qai papitaiso ena 2016.”

E vakayaloqaqataki Brother Norov nona veimaliwai kei ira na itabaqase era matua, era vesu tale ga ena vuku ni nodra vakabauta. E kaya: “Au sa qai kila niu na sotava na ka dredre ena vuku ni noqu tawaveitovaki. Au na vakalagilagia tiko ga na yaca i Jiova keu bala mada ga e valeniveivesu.”

E kaya o tamai Brother Norov: “E ka dokai dina me keitou cakava na inaki i Jiova, me vakayagataki keitou tale ga ena cakacaka bibi qo. Keitou vakavinavinakataki Jiova kina vakavuvale kei ira na mataveitacini ena nodra loloma, masu, kei na nodra veitokoni me rawa ni keitou lomavakacegu qai kabiti Jiova tiko ga. E sega ni dua na ka meda lomaleqataka se rerevaka. Eda na vakila vakacegu ni Kalou, me vaka ga e yalataka ena nona Vosa!”—Filipai 4:6, 7.