Me vaka sa tabaki oti, a sereki totolo mai valeniveivesu o Brother Rustamjon Norov ena ika21 ni Seviteba, 2021. E caka qori ena vuku ni dua na lawa ni boko itotogi (amnesty) a tauyavu ena itekitekivu ni vula qori. E yabaki 22 tiko o Rustamjon ena gauna qo. E tolu na vula nona vesu tu me wawa veilewai. Ena ika10 ni Me 2021, e tokitaki sara ina valeniveivesu i Yavan me lai vakacavara kina na kena itotogi ya me tolu veimama na yabaki. E levu era qoroya nona itovo vinaka kei na nona yalodina ena gauna kece e vesu tu kina vakawawa, veilewaitaki kei na nona vesu.

Dua na gauna ni veilewaitaki tiko o Rustamjon, e lako yani vua e dua na turaganivalu me rau lululu. E kaya ni dua na ka nona qoroya nona yaloqaqa o Rustamjon kei na nona dei. E qai kaya: “Mera vakataki iko mada ga na tamata kece era qaravi Kalou. Qai vakasamataka ena vica na yabaki mai qo ni sa vakadonui na veiqaravi raraba i Tajikistan, o na kilai ni o dua vei ira era sasagataka na dodonu ni lewenivanua qori.”

Levu era qoroya nona itovo vinaka o Rustamjon ena gauna e vesu tu kina. Qori na vuna era sureti koya kina na vakailesilesi ni valeniveivesu me tiko ena dua na vuli e vakarautaka na European Union. Qori ena vakarawarawataka nodra vaqara cakacaka na kaivesu ena gauna era sere kina. Ni oti na vuli, e soli vei Rustamjon e dua nona sitikiviti kei na ivola e vakavinavinakataki kina nona gugumatua. E kaya o Rustamjon nira tukuna na vakailesilesi ni vinaka nona itovo baleta ni muria na ivakavuvuli vakaivolatabu.

Ni se vesu tu o Rustamjon, e sega ni vakadeitaka ke na okati tale ga ena lawa ni boko itotogi. Ia era kaya na vo ni kaivesu nira kila ni na sereki, ni dau vinaka na nona itovo i valeniveivesu. Era dau vakayaloqaqataki koya tale ga o ira na veiqaravi kina.

Me vakataki Rustamjon, o ira na tacida cauravou era vesu ena vuku ni nodra tawaveitovaki kei nodra yalodina, e ‘serau na nodra rarama ena matadra na tamata.’ Koya e bibi sara, na nodra “cakacaka vinaka” e lagiti qai dokai kina na yaca i Jiova.—Maciu 5:16.