Ena ika16 ni Me 2023, e sere mai valeniveivesu e Tajikistan o Brother Shamil Khakimov, e yabaki 72. A vesu tu me sivia e va na yabaki ena vuku ni nona vakabauta.

Ni se bera ni vesu ena yabaki 2019, e tauvi Shamil na tubu ni dra, mate ni uto kei na so tale na mate. Ia a sega ni qaravi vakavuniwai ena gauna a vesu tu kina. E lai tauvimate bibi sara qai vakavuna me vuvuce na yavana.

E dina ni sotava e levu na ituvaki dredre e valeniveivesu, ia e donu tu ga na nona rai ni dau vakananuma vakatitobu e vica na tikinivolatabu.

E dau okata ena nona masu na ka e tukuni ena Same 141:8. E kaya: “Ia na mataqu sa rai yani vei kemuni, na Turaga Cecere Duadua i Jiova. Vei kemuni au sa vakaruru kina.” E vakayaloqaqataki koya tale ga na Aisea 49:13, 16, e tukuni kina ni vaka ga e “ceuti” tu na yacadra na tusaqati na ena liga i Jiova. E vakayaloqaqataki Shamil ni sega vakadua ni guilecavi koya o Jiova ena gauna e vesu tu kina.

Na veivakacegui e vakila mai na vosa i Jiova, e vukei koya me marau tiko ga qai rawa ni uqeti ira eso tale. E kaya e dua na tacida tagane rau dau veivosaki vakalevu kei Shamil ena gauna e vesu tu kina: “Na imatai ni gauna au qiriti koya kina, au namaka ni na rarawa se yalolailai tu. Ia e dei tu ga nona vakabauta. E donu tu ga nona rai ena ituvaki kece e sotava, qai dau vakayaloqaqataki keimami tale mai.”

E kaya na Lele i Jeremaia 3:25 : “E yalovinaka o Jiova vua e nuitaki koya, vua na tamata e qarai koya tiko.” Eda masu ena nuidei ni o Jiova ena “yalovinaka” tiko ga vei Shamil kei ira na vo ni mataveitacini e Tajikistan era vosota tiko ena marau.