A sere mai valeniveivesu o Brother Jovidon Bobojonov ena imatai ni Noveba 2020. Qo na ka e kaya: “E vukei au o Jiova meu yalodina tiko ga.” Qori na ka e kaya ni oti e dua na siga nona sereki koya na Peresitedi e Tajikistan, wili kina o ira na le 377 na kaivesu. A totogitaki o Jovidon me rua na yabaki e valeniveivesu ni sega ni via curu ena mataivalu ena vuku ni nona vakabauta. Ia ena loma ni ciwa ga na vula sa sereki tale mai.

Ena ika4 ni Okotova 2019, era vesuka na sotia na tacida qo mai nona vale ra qai biuti koya ena keba ni mataivalu, qori na gauna e yabaki 19 tiko kina. Ena loma ni vica na vula, e vesu ena levu na Temporary Detention Facility (TDF) era tiko ena keba ni mataivalu. Ena vanua kece e vesu kina e dau tukuni vua me vakamacalataka na vuna e sega ni via vakaitavi kina ena mataivalu. E kaya: “Era dau vakalialiai au na komada kei na sotia nira vakatarogi au, ra qai kaya meu cakitaka noqu vakabauta. Era na saga mera vakacudrui au nira taroga vei au eso na taro. Eso na gauna era na vakayadrati au ena lomaloma ni bogi, ra qai vuki taroga vei au e dua ga na taro. Nira via kila ga na vuna au sega ni curu kina ena mataivalu.

“Ia e yaga vakalevu na masu. Niu vesu tu ena keba ni mataivalu au dau masu vagumatua ena siga kei na bogi. Au dau tagi vei Jiova me vukei au meu kua ni soro, meu kua ni vakacudrui koya, meu kua tale ga ni sauma lesu na veika ca e caka vei au.

“E tokoni au tu ga o Jiova . . . Eso na gauna au yalolailai qai lomabibi. Ia e uqeti au o Jiova qai vakayaloqaqataki au ni vakayagataka na nona ibulibuli. E veimataka ena vakayadrati au na tagi ni manumanuvuka. Ena bogi, au na dagava cake na vula kei na veikalokalo. Na iloloma qori i Jiova e vakamarautaki au qai vakayaloqaqataki au.”

Ena ika2 ni Epereli 2020, e tukuni ni cala o Jovidon, qai tokitaki mai na TDF ina valeniveivesu. E vakatabui me ciqoma e dua na ivola. Ia era dau vakauta na kena na mataveitacini, ra qai dau vola na tikinivolatabu e veisiga ina kato ni kakana. E kaya: “Au sega kina ni galili, au vakila tale ga niu lomani.”

E vakavinavinakataka tale ga o Jovidon ni nanuma vinaka tu eso na tikinivolatabu veiuqeti, me vaka na Roma 8:37-39. E kaya: “Gauna au vesu tu kina au vakila sara ga na dina ni tikinivolatabu qori. Sega ni dua na ituvaki dredre au sotava me tawasei au mai na loloma i Jiova. E vukei au o Jiova meu yalodina tiko ga.”

Na nona ivakaraitaki o Jovidon e vakayaloqaqataki rau dina na nona itubutubu. E kaya o tamana o Abdujamol: “E vakayaloqaqataki keirau na masu kei na nona yalodina tu ga o Jovidon. Dua na ka nodra veitokoni na mataveitacini e veiyasa i vuravura. Keirau vakavinavinakataka nodra veinanumi ena masu. Keirau vakavinavinakataki Jiova tale ga ni vakarautaki ira na mataveitacini dauloloma.”

Ena gauna ni vakataotioti qo, eda namaka nida na sotava na “veivakatovolei katakata.” (1 Pita 4:12) E tinia o Jovidon: “Qo niu sa sereki, au na vakayagataka noqu galala meu vulica kina e levu na ka me baleti Jiova, qai vakarautaki au ena veivakatovolei se bera mai. Vei kemuni na se bera ni sotava na veitusaqati kaukaua, ni vakayagataka na galala qori moni vulica kina e levu na ka me baleti Jiova ena nona Vosa, kei na noda ivola vakaivolatabu.”