Ena Vukelulu na imatai ni Epereli 2020, e tauca na lewa me baleti Brother Jovidon Bobojonov na mataveilewai ni mataivalu e Tajik ena kena koroturaga o Dushanbe, ni sega ni via curu ena mataivalu ena vuku ni nona vakabauta. Sa sivia qo e lima na vula na nona vakalolomataki tu ni vesu tu vakawawa, ni waraka tiko na macala ni nona veilewai.

Ena ika4 ni Okotova 2019, era vesuka na tacida yabaki 19 qo na sotia mai nona vale, ra qai lai biuti koya ena keba ni mataivalu. Ni oti e rua na siga, e vakavodoki vakaukaua ena sitima me kau ena nodra vanua ni vuli na mataivalu ena yasana o Lenin. Sa qai tokitaki ena dua tale na keba, e vakasaurarataki kina me dara na isulu ni mataivalu, me vosa bubului tale ga ina mataivalu. Ena ika28 ni Janueri, e beitaki ni basulawa.

Erau mani kerea na nona itubutubu iVakadinadina i Jiova, me laurai tale mada na nona kisi vei ira na vakailesilesi e Tajikistan, ena valenivolavola ni Peresitedi kei na valenivolavola e qarava na nodra kudru na lewenivanua. Era kaya na vakailesilesi e Tajik ni se wili tiko ga vakabasulawa na ka e cakava o Brother Bobojonov ni sega ni vakarautaki na veiqaravi me isosomi ni curu ena mataivalu. Kena ibalebale e dodonu ga me vesu.

Eda kila ni na vakalougatataka o Jiova na nona yaloqaqa o Brother Bobojonov, ni na vakacegui koya kei na nona vuvale, ena vakaukauataki ratou tale ga.—Same 29:11.