E vesu tu o Brother Eziz Atabayev me rua na yabaki e Turkmenistan. Ia e vosota e levu na ka dredre qai yalodina tu ga vei Jiova. E vesu ni sega ni via curu ena mataivalu ena vuku ni nona vakabauta. Ia sa sere mai ena ika19 ni Tiseba, 2020. Ena tini na yabaki sa oti era vesu e 46 na tacida tagane e Turkmenistan nira sega ni via curu ena mataivalu.

Ena 2016 e vakaroti o brother Atabayev me curu ena mataivalu, ia ena vuku ni nona vakabauta a sega ni vakadonuya qori. E mani kau nona kisi ina valenivolavola ni dauveibeitaki. Oti e rua na yabaki e kacivi me rogoci nona kisi ni veilewai. Ena ika19 ni Tiseba 2018, e totogitaki me vesu me rua na yabaki.

E kaya o Eziz: “Bera niu vesu au dau veivosaki vakalevu kei ira na tacida era a vesu tale ga. Era vakamacalataka vei au na veika au na rawa ni sotava ena gauna ni veilewai, kei na gauna au na vesu kina. Au wilika tale ga eso na irogo ena noda ivola, kei na tikinivolatabu veiuqeti ena iVolatabu.

“Ena mataka lailai ni bera noqu veilewai e wilika vei au e dua na tacida tagane na Aisea 30:15, e tukuni kina: ‘Oni na kaukaua ke oni tiko vakacegu, oni vakanuinui tiko.’ Au lomavakacegu sara ga, qai nuitaki Jiova ena ka kece. Noqu dau vakasamataka vakatitobu na tikinivolatabu qori e vukei au vakalevu ena noqu vesu tu.”

E sega ni rawarawa na ituvaki e valeniveivesu. Ia e dredre vei Eziz ni yawaki ratou tu nona vuvale. E kaya: “Au volekati ira vakalevu na taciqu vakayalo era vesu tale ga. Era noqu itokani dina, ra qai dau vukei au ena gauna au vakananumi ratou kina noqu vuvale kei ira noqu itokani.”

E vakayagataka tale ga o Eziz na gauna qori me vunau kina vei ira eso tale. E kaya: “Taumada eso na kaivesu era tusaqati au ena gauna au vunau kina vei ira. Ia toso na gauna era qai vakarorogo. Era tusaqati au talega eso na kaivesu vou. Ia era dau tokoni au na vo ni kaivesu era sa tiko dede. Era qai dau vakamacalataka vei ira na veika au sa vakavulica oti vei ira.”

Qo na ka e vakasalataki keda kina o Eziz ke da mani vesu: “Au uqeti kemuni me dua nomuni ituvatuva vinaka ni vuli, moni talaucaka talega na lomamuni vei Jiova. Moni masulaka vua na veika kece oni leqataka. Tukuna vei Jiova na ka kece.

“Au vosota rawa ga na ituvaki dredre ena veivuke i Jiova. Au vakadeitaka tale ga ni na vukei au tu ga o Jiova. Au sega ni lomaleqataka na veitusaqati au na sotava ena veigauna se bera mai.”—Same 118:6.