Ena ika19 ni Janueri 2021, e tauca na mataveilewai na Turkmen Civil Court e Turkmenistan, na lewa me baleti brother Ihlosbek Rozmetov. Ni sega ni via curu ena mataivalu ena vuku ni nona lewaeloma, e vesu me rua na yabaki ena nodra valeniveivesu na kaivesu rerevaki. Qo sa ikarua ni gauna me vesu ena nona tawaveitovaki.

Ihlosbek Rozmetov

• Sucu: 1997 (Andalib)

• Kena italanoa: E rua na tacina. Ni se qai yabaki tini sa dau vukei ratou nona vuvale ni suka na vuli. E taleitaka na qito, wilivola kei na ivakatagi. Ena 2010, e tekivu vulica o tinana na iVolatabu. Oti ga e dua na yabaki sa vulica tale ga na iVolatabu o Ihlosbek

Ena ika11 ni Julai 2018, ni se yabaki 20 o losbek Rozmetov sa vesu me dua na yabaki ena keba ni veivakararawataki e Seydi ni sega ni via curu ena mataivalu. Oti e dua na yabaki e sere. Ia na lawa e Turkmenistan, e rawa tale ni beitaki ni sega ni via curu ena mataivalu.

Ena ika25 ni Noveba 2020, e kacivi tale me curu ina mataivalu. E vakamacalataka nona vakabauta, ia era beitaki koya na vakailesilesi ni daubasulawa. Ni sa ikarua ni gauna qo e sega ni via curu ena mataivalu ena vuku ni nona vakabauta.

E kaya o Ihlosbek ni “dredre” na tu e valeniveivesu. Cava sa qai vukei koya? Na tikinivolatabu e wilika ni bera nona vesu, e vakasamataka tale ga vakatitobu. Kena ivakaraitaki na Filipai 4:6, 7. Nona dau vakasamataka vakatitobu na tikinivolatabu qori, e vukei koya me “kua ni lomaocaocataka e dua na ka.” Me masuta na “vakacegu ni Kalou,” me lomavakacegu tale ga ena ituvaki dredre e sotava. E kaya: “Niu masuti Jiova wasoma, au vakila ni volekati au.”

Eda nuidei ni o Jiova ena vakayaloqaqataki Ihlosbek, kei ira kece na nuitaki koya.—Aisea 40:29-31.