Ena vakarau tauca na mataivalu e Turkmenistan a na lewa me baleti brother Ruslan Artykmyradov. Ena rawa ni vesu me rua na yabaki ni sega ni via curu ena mataivalu. Ena ika15 ni Tiseba 2020, sa wawa veilewai tu e valeniveivesu. Qo sa ikarua ni gauna me veilewaitaki ena vuku ni nona tawaveitovaki.

Ruslan Artykmyradov

• Sucu: 2000 (koro o Alpan Gengeshlik)

• Kena italanoa: Susu ena taudaku ni tauni. E cakacaka ena sitoa ni ripea motoka. E taleitaka na vuli kei na qito soka

  E vulica na ivakavuvuli vakaivolatabu vei tinana. E qoroya nodra veilomani kei na nodra duavata na iVakadinadina i Jiova, qai papitaiso ena 2015 ni se qai yabaki 15. E sega ni via vakaitavi ena mataivalu ni lomani Jiova

Ena ika13 ni Okosita, 2018, a vesu o brother Ruslan Artykmyradov ni se qai yabaki 18, me dua na yabaki e valeniveIvesu ni sega ni via vakaitavi ena mataivalu. Oti e dua na yabaki e qai sere ena ika12 ni Okosita, 2019.

Na lawa e Turkmenistan e rawa nira veilewaitaki vakarua o ira na cauravou era sega ni via curu ena mataivalu. E mani kacivi tale o Ruslan ena Noveba 2020, me curu ena mataivalu.

E sega ni vakadonuya o Ruslan, ia e kila tu ni na totogitaki tale. Ena ika15 ni Tiseba 2020, a vesu tu vakawawa me qai rogoci tale nona kisi.

E yalodina tu ga vei Jiova o Ruslan. E kaya ena imatai ni gauna e veilewaitaki kina: “Au kila ni na sega ni rawarawa na veilewai, ena sega ni tau tale ga vakadodonu na kequ itotogi. Ia au lomavakacegu, au na sega vakadua ni vakalaiva e dua na ka me vakaleqa noqu veiwekani kei Jiova.”

E sotava na ka dredre o Ruslan ena gauna e vesu tu kina. E sega ni vinaka na ituvaki e valeniveivesu qai dau vakalolomataki vakalevu. Ia e vakila tu ga na veivuke i Jiova. E kaya: “Niu tu e valeniveivesu au vakila nona veitaqomaki kei na nona veitokoni o Jiova. Kena ivakaraitaki, niu mokulaki au dau vakila ga na imatai ni vacu, oti ya au sa sega ni vakila na mosi.” Kuria ya, era dau vakayaloqaqataki koya nana mataveitacini, e ivakadinadina levu tale ga vei ira na kaivesu.

Dina ena rawa ni vesu tale o Ruslan, ia e kaya: “Au nuidei ni o Jiova ena vakaicovitaki au. Ni tiko na noda inuinui, eda na marau vakalevu. Na marau qori ena vakayaloqaqataki keda, ena vukei keda tale ga meda vosota. Nida yaloqaqa ena sega ni dua ena vakaleqa noda vakabauta.”

Eda vakavinavinakataka nona ivakaraitaki o Ruslan kei ira na vo ni itabagone. Era yaloqaqa ni vakadinadinataka se mani ituvaki dredre cava eda sotava, o Jiova ena vukei keda meda yalodina tiko ga qai marau. Eda kila tale ga nira na vakaicovitaki ena vuku ni nodra yalodina ena Matanitu ni Kalou.—Iperiu 11:6.