E yabaki 19 o Brother David Petrosov qai vakaitikotiko e Turkmenistan. Dina ni se itabagone, ia e vakatovolei vakalevu nona vakabauta—oya nona vesu me dua na yabaki e valeniveivesu ni sega ni via curu ena mataivalu ena vuku ni nona vakabauta. Ia e sereki ena ika30 ni Seviteba, 2020.

E kaya o Brother Petrosov: “Eso na gauna au dau lomabibi niu tu e valeniveivesu. Ia e vakacegui au o Jiova ena nona Vosa. E kila vinaka o Jiova na kequ ituvaki, e tu vakarau tale ga me vakacegui au, qori e uqeti au meu masu vua. Levu na tikinivolatabu e vukei au ena duidui ituvaki, ia au na sega vakadua ni guilecava na Filipai 4:13.”

E sucu o Brother Petrosov ena siti o Ashgabat, e Turkmenistan. E matai sara na qiri qita, e taleitaka tale ga na buli sere, qito soka, taubale ena ulunivanua, kei na sisili ena drano.

E papitaiso ena 2019, ni oti nona vulica na iVolatabu kei na dua nona lewenikalasi e iVakadinadina i Jiova. Ratou sega ni iVakadinadina i Jiova nona lewenivuvale, ia ratou doka nona vakabauta.

Oti ga vakalailai nona papitaiso, e veilewaitaki ni sega ni via curu ena mataivalu. E sega ni vakarautaka o Turkmenistan e dua na cakacaka me isosomi ni curu ena mataivalu. Era mani biuti koya na vakailesilesi me dua na yabaki e valeniveivesu.

E tokoni koya tu ga o Jiova ena gauna e vesu kina. E kaya o Brother Petrosov: “Gauna au vesu tu kina e dau mai tukuna vei au o tinaqu nodra iloloma na mataveitacini era sega ni rawa ni sikovi au. E kaya nira masulaki au tiko, qori e vaka vu marau vei au.”

E tukuni ena lawa e Turkmenistan ni rawa ni vakaroti tale o David me curu ena mataivalu. Ke caka qori, ena rawa ni bala e valeniveivesu me dua na gauna balavu.

E kaya o David: “Me vakataki ira e levu, au sega ni vinakata meu vesu tale. Ia au sega ni rerevaka e dua na ka. E vakayaloqaqataki au na qaqaco ni noqu veiwekani kei Jiova, nodra veitokoni na mataveitacini, kei na noqu dau rogoca na sere ni soqoni.”

Eda nuidei o Jiova ena vakalevutaka nona vakabauta o David, me yaloqaqa tale ga. Meda masulaki ratou tale ga na tini na tacida ratou vesu tiko e Turkmenistan ni ratou sega ni via curu ena mataivalu. O Jiova e lomani ratou, ena tokoni ratou tale ga.—Same 69:33.