Ena ika3 ni Okotova 2020, e kaya o Brother Selim Taganov ni sere oti mai valeniveivesu: “Au lomavakacegu rawa ga ena noqu masuti Jiova.” E se qai yabaki 19 o Selimi, ia sa vesu oti me dua na yabaki ni sega ni via curu ina mataivalu ena vuku ni nona vakabauta.

E sucu o Selim ena siti o Ashgabat, e Turkmenistan. Ni se gone e dau taleitaka na vuli kei na vakatagi. E dau vola sere, lagasere kei na qiri qita. Ratou kaya na nona vuvale kei na nona itokani ni o Selim e dau yalomalua, yalololoma qai mamarau. Ni bera ni totogitaki qo na ka e kaya na loya e lesia na mataveilewai me qarava nona kisi: “O Selim e gone vinaka, e dau dina, e sega ni vakatavako se gunu vakalialia. E se qai tauri vola oti ga ena sekeniri. Ena rawa ni vakaleqai koya ke curu e valeniveivesu.”

E sega ni rawarawa dina na bula e valeniveivesu. Ia qo na ka e kaya o Selim: “Gauna au vesu tu kina sa qai qaqaco ga noqu veiwekani kei Jiova. Au nanuma lesu na veika dina mai na iVolatabu au vulica e vale, au raica tale ga vakabibi. E vakayaloqaqataki au tale ga noqu vakasamataka eso na tikinivolatabu me vaka na Aisea 41:10, 11.

“Sega ni rawarawa na gauna au vesu tu kina vakawawa ni bera niu bala e valeniveivesu, ni sega ni dua keirau veivosaki se meu talaucaka kina na lomaqu. Ia e vukei au noqu dau masu vei Jiova. Era vakayaloqaqataki au tale ga o ira na kaivesu kei ira na yadra era dau vakarerei au tu e liu. Au vakadeitaka kina ni tokoni au tiko o Jiova.”

Era vakayaloqaqataki Selim tale ga na mataveitacini. E kaya: “Gauna au vesu tu kina, levu era vakauta mai nodra iloloma ra qai vakayaloqaqataki au. Au saga meu kila vinaka na veika era tukuna, au qai dau cavuta vakawasoma. E uqeti au vakalevu qori, au lomavakacegu tale ga.”

Ena lawa e Turkmenistan, e rawa ni tukuni tale vei Selim me curu ina mataivalu. Ke yaco qori, e kila o tu o koya ni na rawa ni bala e valeniveivesu me dua na gauna balavu. E kaya: “Au sa vosota rawa na ituvaki dredre qo ena veivuke i Jiova. Au sega gona ni lomaleqataka keu mani sotava tale na ituvaki dredre ena veigauna se bera mai. O Jiova ena vukei au meu yaloqaqa.”

Eda namaka kece meda sotava na veivakacacani ena veigauna se bera mai. E kaya o Selim: “Vei kemuni oni na vakatovolei me vakataki au, moni kua ni guilecava na ka e kaya na Aisea 30:15: ‘Oni na kaukaua ke oni tiko vakacegu, qai vakanuinui tiko.’”