Ena ika6 ni Okosita 2020, e vakataulewataka na mataveilewai e Turkmenistan me rau vesu me rua na yabaki na veitacini o Brother Eldor kei Sanjarbek Saburov. Rau totogitaki ni rau sega ni via curu ena mataivalu ena vuku ni nodrau vakabauta. E dua e yabaki 21, dua tale e yabaki 25. E mani sega ni vakadonuya na mataveilewai na nodrau kerekere me rogoci tale na nodrau kisi. Qo na ikarua ni gauna rau totogitaki kina ena vuku ni nodrau tawaveitovaki.

Ena 2016, e sega ni vakadonuya o Brother Sanjarbek Saburov me curu ena mataivalu. E mani totogitaki koya na mataveilewai me vakatatabutaki me rua na yabaki.

Ena yabaki ga e tarava, e sega tale ga ni vakadonuya o Eldor na tacina me curu ena mataivalu. E mani totogitaki me rua na yabaki na nona cakacaka e tuba. Kena ibalebale qori, ni na sauma tiko e 20 na pasede ni nona veisaumi ina matanitu.

Ena lawa ni matanitu o Turkmenistan, ke dua e sega tiko ga ni via curu ena mataivalu ena vuku ni nona vakabauta ena rawa ni totogitaki vakarua. Ena Epereli 2020, e baci saga tale na mataivalu me vakacurumi rau na veitacini. Erau mani sega ni vakadonuya, rau veilewaitaki qai totogitaki me rau vesu.

E sega ni rawarawa qori vei rau na veitacini, vaka tale ga kina vei rau na nodrau itubutubu. E dau tauvi tamadrau na mosi ni daku, qai tutu yadua me cakacaka. Erau dau tei vauvau na veitacini me rau tokona kina na vuvale. Qo ni rau sa vesu, sa na leqa nodratou bula vakailavo na vuvale. Sa na vinakati tale vei rau na itubutubu, me rau tokoni luvedrau e valeniveivesu.

E sega ni vakarautaka na matanitu o Turkmenistan na cakacaka me isosomi ni curu ena mataivalu. Era na rawa gona ni vesu me dua ina va na yabaki na tacida cauravou era sega ni via curu ena mataivalu ena vuku ni nodra vakabauta. Ena gauna qo era sa vesu tiko e tini na tacida cauravou ena valeniveivesu e Turkmenistan, wili kina o rau na veitacini na Saburov ena vuku ni nodra tawaveitovaki.

Eda kila ni o Jiova ena vakalougatataki ira na tacida cauravou qo e Turkmenistan ena vuku ni nodra yaloqaqa. Mera nanuma mada ga na ka e yalataka o Jiova vei Tui Esa: “O kemuni, moni yaloqaqa, moni kua ni yalolailai ni na saumi na nomuni cakacaka.”—2 Veigauna 15:7.