Ena ika18 ni Janueri 2021, e kaya na mataveilewai e Turkmenistan ni cala o brother Maksat Jumadurdyyev. Ena vesu me rua na yabaki ni sega ni via curu ena mataivalu ena vuku ni nona vakabauta.

Maksat Jumadurdyyev

• Sucu: 2000 (Seydi, e Lebap)

• Kena italanoa: Rua na ganena. Dau gumatua na vuli. E taleitaka na qito. Kenadau ena droini kei na boroboro. Kilai ena nona itikotiko ni dauyalomalua, dau dina, e gumatua tale ga ena cakacaka

  Ena 2018, e vulica na iVolatabu qai papitaiso ena 2019. O koya duadua ga e iVakadinadina i Jiova ena nona vuvale

Sa dua na yabaki oti e valeniveivesu o brother Maksat Jumadurdyyev ni sega ni via curu ena mataivalu. Ia ena ika17 ni Julai 2019, sa sere mai. Na lawa e Turkmenistan ena rawa ni veilewaitaki tale ni e sega ni via curu ena mataivalu. E mani vakaroti o Maksat me curu tale ina mataivalu ena Maji 2020. Dina ni kila ni na vesu tale, e vola ga na nona ivola ni sega ni via curu ena mataivalu.

Ena ika30 ni Tiseba 2020, e tukuni ni dua tale na kisi e beitaki kina ni oti e vica na veivaqaqai kei na nona dikevi vakavuniwai. Era taura tale ga na vakailesilesi na nona pasipote.

E dredre na imatai ni nona veilewai, kei na nona vesu. E kaya: “Niu vesu ena 2018, e dredre vei au niu veitawasei tu kei rau noqu itubutubu. . . . Rau sega ni iVakadinadina i Jiova na noqu itubutubu, rau kaya keu sega ni curu ena mataivalu rau na sega ni tokona na noqu vakatulewa.”

E nanuma lesu o Maksat: “Na ka e tukuni ena Marika 10:29, 30, e vukei au meu vosota noqu yawaki ratou tu noqu vuvale kei ira noqu itokani. E kaya o Jisu ke da mani vakacacani ena vuku ni yacana, kei na vunautaki ni itukutuku vinaka, eda na vakalougatataki vakalevu.”

Gauna e vesu tu kina e vakila ni sauma dina o Jiova nona masu, e vukei koya tale ga ena ituvaki dredre e sotava. E dau nanuma lesu na ka e tukuni ena Josua 1:9: “Mo yaloqaqa mo kaukaua. Mo kua ni domobula se rere ni tokoni iko o Jiova na nomu kalou ena vanua kece o lakova.”

Ni bera nona ikarua ni veilewai, e vakadeitaka o Maksat me muria nona lewaeloma e vakavulici ena iVolatabu. E kaya: “Keu vesu mada ga vakarua, au vakabauta ni o Jiova ena vukei au tu ga se mani vacava na dredre au sotava. Na ivakasala ena Filipai 4:6, 7 e vukei au meu yaloqaqa qai lomavakacegu.”

Meda nanumi Maksat ena noda masu, kei na so tale na tacida era yaloqaqa ni tutaka na veiliutaki cecere i Jiova. Eda nuidei ni o Jiova ena vakalougatataka na nodra yalodina na tacida era vesu ena vuku ni nodra vakabauta.—Vakatakila 2:10.