Ena ika12 ni Noveba 2019, e beitaki Brother Serdar Dovletov e yabaki 26, na mataveilewai e Turkmenistan ni cala, qai totogitaki koya me tolu na yabaki e valeniveivesu. O Brother Dovletov e dua vei ira na le tini na tacida ena matanitu qori era vesu nira sega ni via curu ena mataivalu ena vuku ni nodra vakabauta. Ena 2019, ratou beitaki e le vitu, e le tolu tale ratou beitaki ena 2018. E duidui ga na gauna ratou vesu kina ena loma ni dua ina va na yabaki.

E tiko o Brother Dovletov ena siti o Baýramaly, ena Yasayasa o Mary, ena ceva kei Turkmenistan. E iVakadinadina i Jiova tale ga o watina o Surya, kei na tinana o Sonya.

Ena ika11 ni Noveba, 2019, a tekivu veilewaitaki kina o Brother Dovletov. E kaya ena mataveilewai ni sega ni via curu ena mataivalu ena vuku ni nona vakabauta. Ratou kaya tale ga e tolu na vuniwai ena mataveilewai ni na sega ni rawa ni curu ena mataivalu o Brother Dovletov ni tauvimate bibi.

E sega ni duavata o turaganilewa ena ivakadinadina qori, e beitaki Brother Dovletov tiko ga ni beca na lawa ni sega ni via curu ena mataivalu, mani bala kina e valeniveivesu. Kena ibalebale ena vesu vata kei ratou na ciwa na tacida ena keba ni veivakararawataki e Seydi, ena vanua dravuisiga ena Yasayasa o Lebap. Ena kerea o Brother Dovletov me rogoci tale nona kisi.

Nira sotava tiko na tacida e Turkmenistan na ituvaki tawadodonu qori, meda masulaki ira ena nuidei ni na vakayacora o Jiova na ka e yalataka me tokona nodra yaloqaqa kei na nodra yalodina.—Same 37:18, 24.