Ena ika19 ni Janueri 2021, e vakataulewataka na mataveilewai e Turkmenistan me bala e valeniveivesu o brother Veniamin Gendjiyev me rua na yabaki ena vuku ni nona vakabauta.

Veniamin Gendjiyev

• Sucu: 2000 (Seydi)

• Kena italanoa: Susu ena vuvale iVakadinadina i Jiova. Ni yabaki 15 sa dautukutuku bera ni papitaiso, e papitaiso sara ni yabaki 19. E dauyalomalua, e rawarawa tale ga na veivosaki kei koya

  Vulica me dau ripea motoka. Taleitaka na qito kei na qiri qita. Era dau vakalialiai koya nona lewenikalasi ena vuku ni nona vakabauta. E dei tu ga ena ivakavuvuli vakaivolatabu e vakabauta

Ena Julai 2018, a vesu o Veniamin me dua na yabaki ena vuku ni nona vakabauta. Ena ika25 ni June 2019, sa sereki mai.

Ena ika25 ni Tiseba 2020, a vakaroti me gole ina nodra ofisi na dauveibeitaki e Dyanev District. Ratou kerei koya na vakailesilesi me vakamacalataka nona sega ni via curu ena mataivalu ena vuku ni nona vakabauta. Ena ika30 ni Tiseba 2020, ratou tukuna vua ni sa beitaki tale ni daubasulawa. E tauri vakaukaua nona pasipote.

E kaya o Veniamin ena imatai ni nona vesu: “Au vakila ni tokoni au tu ga o Jiova. E solia vei au na kaukaua, e vaqaqacotaka tale ga noqu vakabauta. E vakayaloqaqataki au vakalevu noqu dau tukuna vua niu wasea vei ira na kaivesu na itukutuku vinaka.

“Rau dau mai tukuna vei au noqu itubutubu nodra iloloma na tacida era sega ni rawa ni sikovi au. Qori e vukei au meu vosota tiko ga me yacova noqu sere.”

E dau vakayaloqaqataki Veniamin na Aisea 54:17. E kaya, “ena tawayaga na iyaragi kece e buli mo valuti kina.” Na tikinivolatabu va qori kei na noda masulaki koya ena vukei koya me yalodina tiko ga.