Ena ika10 ni Feperueri 2021, e beitaki ena mataveilewai i Turkmenistan ni cala o Brother Nazar Alliyev. E totogitaki me dua na yabaki ena vuku ni nona vakabauta.

Nazar Alliyev

• Sucu: 2000 (Yasana o Lebap)

• Me baleti koya: Tiko i Türkmenabat kei tinana, kei na rua na tacina. Taleitaka na qito volleyball kei na soka. E laurai vua e rua na mataqali mateniuto. E dauveikoti me tokona kina nona vuvale

  E vulica vei tinana me dau mareqeta na ivakavuvuli vakaivolatabu. E papitaiso ena 2015 ni se qai yabaki 14. E kilai ni dau mamarau, lomasoli, e dau yalomalumalumu tale ga. Ratou marautaka na nona vuvale ni yalodina tiko ga

Ena ika16 ni Me 2020, a kau o Brother Nazar Alliyev ina ofisi ni mataivalu. Era vakasaurarataki koya na vakailesilesi me dara na isulu ni sotia me vakaraitaka ni sa curu ena mataivalu. Ia e sega ni via cakava qori. Ena ika28 ni Me, a laurai tale vei ira na vakailesilesi. Ia e sega ga ni via curu ina mataivalu. Ena vula e tarava e volavola ina ofisi ni mataivalu me vakamacalataka na nona vakabauta.

Ena ika4 ni Janueri 2021, rau gole o Nazar kei tinana ina ofisi ni dauveibeitaki ena yasana o Khojambaz. E vakamacalataka kina o Nazar na vu ni nona sega ni via curu ena mataivalu. E kerea me cakava e dua tale na cakacaka. Ia e kaya na vakailesilesi ni na veilewaitaki ga

Qo sa yabaki 20 o Nazar, e kaya: “Ni o nuitaki Jiova ena ituvaki va qori, ena vukei iko o koya mo lomavakacegu. Ena veivuke ga i Jiova o na rawa ni vosa ena nuidei.”

Sa qai tukuna: “Niu vakasamataka na ka e yaco, au kila ni o Jiova ga e tokoni au tiko mai. Au kila gona ni na tokoni au tale ga ena veigauna se bera mai.”

E sega ni vakarautaka o Turkmenistan na cakacaka raraba me isosomi ni veiqaravi ena mataivalu. E rawa gona nira vesu me rua na yabaki o ira na tacida cauravou era sega ni via curu ena mataivalu ena vuku ni nodra vakabauta. Ena gauna qo era vesu tiko e Turkmenistan e 15 na tacida cauravou era tawaveitovaki.

Eda kila ni o Jiova ena vakaraitaka tiko ga nona “yalodina” vei Nazar, kei ira na tacida cauravou i Turkmenistan.—Same 18:25.