Ena ika16 ni Maji 2021, e tauca na lewa na mataveilewai mai Turkmenistan ena kisi me baleti Brother Rasul Rozbayev, e yabaki 21. E totogitaki me rua na yabaki e valeniveivesu ni sega ni via curu ena mataivalu. Qo sa ikarua ni gauna me totogitaki ena vuku ni nona tawaveitovaki.

Rasul Rozbayev

• Sucu: 1999 (Khallang)

• Me baleti koya: Rua na ganena e qase vua kei na dua na tacina gone. Oti nona vuli ena sekeneri, e vulica sara na veikoti. E taleitaka na qito soka, volleyball, kei na qalo

  Rau mai iVakadinadina i Jiova na nona itubutubu ena gauna se gone kina. Papitaiso ena 2013

Ena ika19 ni Tiseba 2017, a tekivu beitaki kina o Brother Rasul Rozbayev ni sega ni via curu ena mataivalu. E mani totogitaki me rua na yabaki nona cakacaka i tuba. E soli vua e dua na tikiniqele me tea kina na witi, me qai solia ina matanitu e 20 na pasede ni nona itei. E yawa sara mai vale na nona iteitei. Ena taubale ni sega na nona motoka.

Ena lawa ni Turkmenistan, ena rawa ni beitaki tale vakarua o Rasul ni sega ni via curu ena mataivalu. Ena ika22 ni Epereli 2020, e gole ina ofisi ni mataivalu me lai tukuna kina ni sega ni via curu ena mataivalu. Oti qori e kacivi wasoma ina keba ni mataivalu me lai vakatarogi, dikevi vakavuniwai qai vakarerei ni na vesu me vica vata na vula. Ena ika22 ni Janueri 2021, e qai kau cake na nona kisi vei ira na dauveibeitaki.

E vakayaloqaqataki Rasul na nodra ivakaraitaki na tacida era sotava tale ga na ituvaki qori. E kaya: “Nodra ivakaraitaki e vukei au meu nuitaki Jiova . . . e vakaukauataki au tale ga meu vosota na ituvaki dredre. Keu yalodina tiko ga, au na vakamarautaki Jiova kei Jisu.” Qori e vakatovolei tale ga kina na nodratou yalodina na nona vuvale. Qo na ka e kaya o tinana ni dau vakayaloqaqataki koya ena gauna dredre qori: “Niu wilika na ivakaraitaki ena iVolatabu qai sarava na noda vidio, au vulica kina ni levu tale ga era sotava tiko na ituvaki va qo. Era sotava tale ga qo na mataveitacini, ia era yalodina tiko ga. Nodra ivakaraitaki e uqeti au meu vosota.”

E vakacegui Rasul na ka e tukuni ena Same 37:23, 24. Ena veivuke ga i Jiova, eda kila ni na dei tiko ga nona vakabauta o Rasul kei ira na vo ni tacida cauravou, era na yaloqaqa, yalodina qai marau tiko ga.