Ena Janueri 2018, rau vesu me yabaki dua e valeniveivesu o Arslan Begenjov kei Kerven Kakabayev ni rau sega ni via curu ina mataivalu. Rau sega ni via curu ina mataivalu ena vuku ni nodrau vakabauta, rau dua tale ga vei ira na iVakadinadina i Jiova. Rau a vakaraitaka nodrau tu vakarau me rau vakataivi ena veiqaravi raraba, ia se sega ni kila na matanitu o Turkmenistan na nodra dodonu na sega ni via curu ina mataivalu, se sega tale ga ni vakarautaka na veiqaravi raraba me isosomi ni curu ina mataivalu.

Era vesuki Mr. Begenjov na ovisa ena ika2 ni Janueri, qai vesuki koya tu vakawawa me yacova ni rogoci nona kisi. Ena ika17 ni Janueri, e beitaki koya na mataveilewai ni sega ni via curu ina mataivalu, mani curu me dua na yabaki e valeniveivesu. E vola o Mr. Begenjov nona ivola ni kudru ena nona vesu vakatawadodonu.

E vesu tale ga o Mr. Kakabayev ena vula o Janueri. E vesu vakatawadodonu e valeniveivesu ena ika29 ni Janueri. Ena gauna e rogoci tiko kina nona kisi, e sega ni vakatarai koya na mataveilewai me vakaraitaka na kena tokoni koya na vakatulewa ni Komiti e dau valataka na dodonu ni lewenivanua (UN Human Rights Committee). Ena rairai sega tale ga ni rogoca na mataveilewai na nona kerekere. Era vunitaka na ivakalesilesi ni Valeniveivesu na ivola ni kerekere era vakarautaka na nona loya me baleti koya. Na ka e caka qori, sa na sega kina ni rawa ni sainitaka na ivola ni kerekere o Mr. Kakabayev ena loma ni tini na siga ni nona vesu me vaka e vakaroti ena lawa.

Qo e sa ikarua ni nona vesu o Mr. Kakabayev ena vuku ni nona sega ni via curu ina mataivalu. Ena Tiseba 2014, era totogitaki koya na ivakalesilesi me rua na yabaki na cakacaka e tuba, kena ibalebale qori ni na sauma tiko e ruasagavulu na pasede ni nona veisaumi ina matanitu.

E tukuna tiko na matanitu o Turkmenistan ni doka na nodra dodonu na kena lewenivanua, ia e sega ni via kila na nodra dodonu na sega ni via curu ina mataivalu, e sega tale ga ni kauaitaka na ivakaro ni ituvatuva me muri e sa caka tiko e vuravura raraba.

Ena 2015 kei na 2016, e sega ni duavata na komiti ena vakataulewa e cakava o Turkmenistan ena vukudratou na le tini na iVakadinadina ratou sega ni via curu ina mataivalu. E beitaki Turkmenistan na komiti ni vakacacani ira na iVakadinadina qai vesuki ira nira sega ni via curu ina mataivalu. Ena Epereli 2017, e vakaraitaka tale na Komiti na nona kauai ena nona “sega tiko ga ni via kila o Turkmenistan na nodra dodonu o ira na sega ni via curu ina mataivalu kei na nodra vakacacani qai vesu tiko na iVakadinadina i Jiova nira sega ni via curu ina mataivalu.” E vakaroti o Turkmenistan me vakarautaka na veiqaravi raraba, tarova na nodra vakacacani o ira na sega ni via curu ina mataivalu, mera sere tale ga o ira na vesu tiko nira sega ni via curu ina mataivalu.

Ena veiyabaki sa oti, sa laurai eso na veisau ena vakatulewa e cakava na matanitu vei ira na sega ni via curu ina mataivalu ena vuku ni nodra lewaeloma. Me tekivu mai ena Tiseba 2014, sa sega nira qai vesu tiko na iVakadinadina ena vuku ni nodra sega ni via curu ina mataivalu, ia me vaka ga na itotogi a tau vei Mr. Kakabayev ena 2014, era sa na solia tale ga e ruasagavulu na pasede ni kedra isau ina matanitu me rua na yabaki o ira na sega ni via curu ina mataivalu se na itotogi e vakatokai na conditional sentence. * Ena Feperueri 2015, e sere mai valeniveivesu na iotioti ni iVakadinadina a vesu ni sega ni via curu ina mataivalu. Ia ena kisi me baleti Mr. Begenjov kei Mr. Kakabayev, e veisau tale na vakatulewa e dau tauca na matanitu o Turkmenistan vei ira na sega ni via curu ina mataivalu, sa sega tale ni qai via kila na nodra dodonu na sega ni via curu ina mataivalu.

Era vesuki Bahram Hemdemov tiko ga e valeniveivesu na ovisa ni muria tiko na galala ni nona sokalou. Ni dua vei ira na iVakadinadina i Jiova, a curu e valeniveivesu ni caka lotu tiko ena nona vale e Turkmenabad. Ena loma ni rua na yabaki sa sivi, e sa vosoti ira e levu na peresitedi kei Turkmenistan, ia se vesu sara ena 2015 o Bahram Hemdemov. E vosoti ira e udolu na kaivesu na Matanitu, ia e sega tiko ga ni via rogoca na nona kerekere o Mr. Hemdemov me sere.

Era diva tu na iVakadinadina i Jiova mera vukei o ira era vakabauta vata e Turkmenistan. Era nuitaka tu ni na doka o Turkmenistan na nodra dodonu ni galala ni vakabauta kei na lewaeloma, me caka tale ga e dua na ka ena veika tawadodonu e caka tiko.