A sereki mai valeniveivesu o Bibi Rahmanova ena 8 na kaloko ena bogi ni ika2 ni Seviteba 2014, ia e sega ni se boko na cala e beitaki kina. Ni rogoca tale nona kisi na mataveilewai e Dashoguz, a veisautaka ga na itotogi a tau taumada vua. A vakarota na mataveilewai me sereki mai valeniveivesu, me lai cakacakataka e tuba na kena itotogi. * Eratou yavutaka na nodratou lewa na turaganilewa ena ituvaki kei Bibi, ni yalewa e tiko na luvena tagane e yabaki va qai se sega ni bau beca vakadua na lawa.

A kerea o Bibi me rogoci tale na nona kisi ni veilewai, a beitaki kina ena ika18 ni Okosita ni “buturaka e dua na ovisa” kei na nona “ivalavala kaukaua.” Ena ika5 ni Julai, ratou lai vosa na ovisa vei Bibi kei na watina o Vepa ena ikelekele ni sitima e Dashoguz, ni ratou sa taura oti eso na nodrau iyaya wili kina eso na ivola ni lotu. E mani bokoci na kena itotogi o Vepa, ia e bala e valeniveivesu o Bibi ena ika8 ni Okosita. E vakalolomataki vakaca o Bibi ena gauna e vesu tiko kina.

E sega wale ga ni sereki koso o Bibi ni valataka nona kisi e dua na turaganilewa mai vanua tani, ia e kilai raraba tale ga e vuravura na nona bala vakatawadodonu e valeniveivesu o Bibi.

Qori e sega ni se qai imatai ni kisi ni iVakadinadina i Jiova e Turkmenistan. Era dau vakalolomataki vakaca na iVakadinadina ni dau saqati na nodra dodonu yadua. Ratou bala e valeniveivesu e le walu na iVakadinadina ni ratou tutaka nodratou vakabauta. E bala e le ono vei ratou qori ni ratou sega ni via curu ena mataivalu, e rua tale rau beitaki ni rau sainitaka vakailawaki e dua na pepa. E vakaloloma na rumu ratou vesu tu kina, qai vakayacori vei ratou e levu na ivalavala kaukaua.

Ia e duatani sara na lewa e tauca na Mataveilewai e Dashoguz vei Bibi, ia e sega ni tau vakadodonu na lewa. Era nuitaka tu o ira na dau doka nodra dodonu na lewenivanua me na veisautaka ena dua na gauna na nona lewa na matanitu o Turkmenistan, me kauaitaka na dodonu ni tamata yadua ena nona solia na galala ni sokalou vei ira na lewenivanua.