Ena ika13 ni Feperueri, 2019, e sere mai valeniveivesu e Turkmenistan o Bahram Hemdemov, yabaki 55, ni oti e va na yabaki nona curu tu ena valeniveivesu e Seydi (LB-E/12). Sa vakasukai tale vei watina o Gulzira kei ratou na va na luvena. A vesu o Hemdemov ena ika14 ni Maji, 2015, ni vakayacori tiko ena nona vale ena dua na tauni kei Turkmenadad, na soqoni. E tauca na kena itotogi na Mataveilewai e ra e Lebap ena ika19 ni Me, 2015. E vakadonuya vakatolu e veiyabaki na matanitu o Turkmenistan me sere e dua na kaivesu ena gauna e vesu tu kina o Kemdemov, ia e sega ni nanumi o koya ena gauna qori. Era sereki mada ga o ira na beitaki nira laba. Ena ika15 ni Okosita, 2016, e vakauta nona ivola ni kudru ina Komiti ni Matabose kei Vuravura e Qarava na Dodonu ni Lewenivanua (UN Human Rights Committee (CCPR), ia e se waraki tiko na kena macala. Era le tinikadua na iVakadinadina i Jiova era vesu tiko ena gauna qo e Turkmenistan ena vuku ni nodra sega ni via vakaitavi ena mataivalu. E sega tiko ga ni via muria na matanitu na veivakaroti ni CCPR oya me tarovi na nodra vakacacani kei na nodra vesu na iVakadinadina era sega ni via curu ina mataivalu.