Ena ika17 ni Tiseba 2020, e tauca na European Court of Human Rights (ECHR) na lewa me baleta na kisi na Tretiak v. Ukraine. E tukuni kina ni dina o Brother Oleksandr Tretiak. Ena ika26 ni Noveba, 2013, a mokulaki vakaca o Brother Tretiak vei ratou na le tolu na dauvakavuca ni lesu tiko mai na cakacaka vakaitalatala. E kaya na ECHR ni ratou sega ni vaqaqa vinaka na kisi o ratou na vakailesilesi e Ukraine. E tukuna na mataveilewai me saumi o Brother Tretiak ena $9,100 na ilavo ni Merika.

E curu tu e valenibula o Brother Tretiak me voleka ni dua na vula ni mokulaki vakaca. Oti e tolu na vula ratou sa qai lai vaqaqa na kisi qori na ovisa. Ratou sega tale ga ni via tukuna ni vu nona mokulaki o Brother Tretiak ni dua na iVakadinadina i Jiova, ratou sega tale ga ni ripotetaka ni mavoa vakaca. Ratou kaya tale ga na ovisa ni sega ni cala levu sara na ka e ratou cakava na dauvakacaca. Kuria qori, e beitaka ga e dua vei ratou, ia sa dro tale ina dua na vanua. E rau okati ga na le rua tale na dauvakacaca, wili kina e dua na ovisa me ratou ivakadinadina ena ka e yaco ya. E sega ni dua vei ratou e totogitaki. Na ka e yaco qo, wili tale ga kina eso na veika tawadodonu e caka, e uqeti Brother Tretiak me kerekere ina ECHR ena 2015.

E vakataulewataka na ECHR ni ratou “sega ni vaqaqa vinaka na vakailesilesi e Ukraine na nona vakalolomataki o Brother Tretiak,” qori e veicalati kei na European Convention on Human Rights.

Eda nuitaka ni vakataulewa qo ena taqomaka na nodra dodonu ni sokalou e Ukraine kei na so tale na vanua. Eda vakavinavinakataki Jiova ni o koya ga ena vakataulewa dodonu ena vukuda.—Lele i Jeremaia 3:59.