Ena ika24 ni Feperueri 2022, a yaco na veivaluvaluti e Ukraine. Levu na tacida era tiko ena vanua e yaco vakalevu kina na ivalu. Rauta ni 21 na tacida ena siti o Kremenchuk kei Poltava, era vakaraitaka nodra lomani ira na tacida nira bole mera lai vueti ira, ra veisoliyaka tale ga na iyaya ni veivuke.

Ena loma ni ono na macawa, era gole vaka80 na tacida qori e Kharkiv na vanua e yaco tiko kina vakalevu na ivalu, mera lai vueti ira mai na tacida. Qori e tautauvata nira lakova tiko e rauta ni 50,000 na kilomita.

Gauna qo, sa veisoliyaki e 23 na tani na kakana, wainimate, waiwai, kei na so tale na ka. Ni bera nira gole na tacida, era na vakasamataka vinaka na vanua mera muria me rawa nira taqomaki, ra kua tale ga ni vakaleqai. Era na kele ena vanua ni yadra me laurai na nodra motoka, kena ibalebale ena taura tiko e 19 na aua na nodra ilakolako.

Nira gole tiko, e veivukayaki e macawa na waqavuka ni ivalu. Era raica na vale sa bomutaki tu, e vakarusai tale ga na taqe ni ivalu kei na motoka. Eso na gauna era vakila na tacida na yavavala ni qele ena kacabote ni bomu.

Ena ika2 ni Epereli 2022, a vakarau tiko o Roman me veisoliyaka na iyaya ni veivuke vei ira na tacida e Kharkiv. Gauna vata qori e kacabote e gaunisala e levu na gasaukuro. A lai vakaruru ena dua na vale e toka voleka e kea. Oti e 30 na miniti, e raica ni sa vakacacani na gaunisala me muria.

O Volodymyr, e dua vei ira na tacida e bole me draiva. E kaya me baleta na ituvaki qori: “Keitou masulaka wasoma vei Jiova me solia vei keitou na vuku, me rawa ni keitou vakatulewa vinaka kina.”

Ratou tiko e Kharkiv o Oleksandr, na watina o Valentyna, kei rau na itubutubu nei Oleksandr. Ratou raica tiko mai ena nodratou katuba leka na kacabote ni bomu, e rauta ni 100 na mita na kena yawa. E sega ni rawa gona ni ratou dro, ni sega na lori.

Ratou mani vueti vei ira na tacida. E kaya o Oleksandr: “Keitou masu vei Jiova, qai vakavinavinakataka na nodra veivuke na tacida.”

Vica vata na siga nodratou vuni tu ena ruku ni nodratou tabavale e ra o Vasyl, na watina o Natalia, kei na tolu na luvedrau. Ena ika29 ni Feperueri 2022, e kacabote na bomu e yasa ni nodratou vale. Na kaukaua ni kena kacabote e vakarusa sara ga nodratou vale. E kaya o Vasyl ni rogo levu na kacabote ni bomu, e boko tale ga na cina kece ena ruku ni vale ratou tiko kina.

Ni cegu vakalailai na ivalu, ratou lai vakaruru sara ena dua tale na rumu ni taba vale e ra e toka volekati ratou. Ena ika3 ni Maji 2022, ratou vueti vei ira na tacida, ratou qai kau ena vanua ratou taqomaki kina.

Qo na ka e kaya o Vasyl ni ratou vueti, qai vakaruru ena vanua e taqomaki vinaka: “Dua na ka neitou vakavinavinakataki Jiova. Keitou nanuma ni na dede neitou tiko ena tabavale e ra. Ia na nodra veivuke na tacida, keitou vakila na vakacegu, keirau sega tale ga ni leqataki ratou na gone.”

A veivuke tale ga ena draiva o Oleksandr. E vakamacalataka nodra veivueti tiko na tacida, e vakadinadinataka na nodra duavata na tamata i Jiova. E kaya: “Au vakadeitaka ni o Jiova e kauaitaki ira dina nona tamata. Dua na ka noqu marau niu raica nodra matadredredre na tacida.”

Eda vakavinavinakataka nodra yaloqaqa na tacida mera veivuke. Eda masulaka tale ga ni o Jiova ena vakalougatataka nodra vakuai ira.—Roma 12:10.