Ena ika23 ina 31 ni Julai 2022, era papitaiso e levu ena veivanua e Ukraine kei na so tale na vanua ena Soqo ni Veiwasewase ni 2022, e kena usutu ‘Saga na Vakacegu’! Me yacova mai na ika2 ni Okosita, e rauta ni le 1,113 era papitaiso e Ukraine. E kaya e dua na tacida tagane e Ukraine: “Na ivalu e sega ni tarova rawa na cakacaka ni veivakatisaipelitaki, ni yalataka o Jisu: ‘Au tiko vata kei kemuni ena veisiga kece.’”—Maciu 28:20.

Eda marau nida raica na nodra toso vakayalo. Qo eso na kena ivakaraitaki.

O Natalia e yabaki 63, e rua na luvena yalewa, qai tiko e Kreminna ena yasayasa o Luhansk. Ena veiyabaki ni 1990, ratou vulica vakaveitinani na iVolatabu kei ira na iVakadinadina i Jiova. Toso na gauna, rau papitaiso na luvena, ia e sega ni toso vakayalo o koya. Ni tekivu na ivalu, ratou lai kauti Natalia mai e dua na vuvale iVakadinadina i Jiova me ratou dro ena vanua me ratou taqomaki kina. E lai vakaicili sara o Natalia ena dua na Vale ni Soqoni e Ivano-Frankivsk.

E kaya: “Oti na vakacabote bomu, au veilecayaki qai rarawa vakalevu. Ia era vakaraitaka na mataveitacini nira lomani au dina. Au sega ni namaka me va sara ya na ka era cakava. Gauna qori, e vakaukauataki sara ga noqu lomani Jiova. Au wilika wasoma na iVolatabu, e solia tale ga vei au e dua na tacida yalewa na ivola Marau me Tawamudu! qai taroga keu via vulica na iVolatabu. Au kila ni talai koya mai o Jiova. Qo au marau niu sa papitaiso meu iVakadinadina i Jiova. Au via muria na ivunau levu duadua, ya meu lomani Jiova na Kalou ‘ena lomaqu taucoko, ena noqu vinaka taucoko, kei na noqu vakasama taucoko.’”—Maciu 22:37.

E tiko e Cherkasy o Olia. Ni tekivu na ivalu, sa dautukutuku bera ni papitaiso tiko. Ena ika6 ni Maji, e dro i Poladi kei luvena yalewa, kei na makubuna yalewa. E kaya: “Keitou kauta ga na neitou go bag. Ia ni keitou yaco yani, dua na ka nodra kauaitaki keitou na mataveitacini. Au vakadeitaka kina ni laurai ga na duavata ena isoqosoqo i Jiova, qai dusimaka tiko na yalona tabu. Na ka kece au sotava, e uqeti au meu yalataka noqu bula vua. E vukei au o Jiova ena ituvaki dredre au sotava, au vinakata tale ga meu qaravi koya qai vakaraitaka noqu vakavinavinaka vua.”

E yabaki 18 o Yulia, qai tiko ena yasayasa o Donetsk. A susu ena dina, ia e sega ni toso vakayalo. Qo na ituvaki e sotava ni se qai tekivu na ivalu. E kaya: “Gauna au davo tu kina ena fuloa, au kila tu ga niu na mate. E vakarusai kece na vale ena vanua keitou tiko kina, ia keitou bula vakavuvale. Na ituvaki au sotava qori, e vukei au meu masu vei Jiova, qai vakasamataka vakatitobu na nona itovo. E vakavolekati au sara ga vua, au vakadeitaka tale ga meu yalataka noqu bula vua. E sauma o Jiova na noqu masu, keirau veivolekati tale ga. Au dau kila tu ga na veika me baleta na Kalou, ia qo au sa lomani koya vakalevu.” E papitaiso o Yulia ena ika23 ni Julai.

Ni tekivu na ivalu, e dro o David e yabaki 11 kei ratou nona vuvale e Jamani. Ni yabaki 9, sa dautukutuku bera ni papitaiso. E via sauva tiko eso nona isausau vakayalo. E kaya: “Au via papitaiso niu lomani Jiova, au vinakata tale ga meu nona itokani. Gauna au papitaiso kina, au luluvu ena levu ni noqu marau niu sa mai lewena na vuvale totoka i Jiova. Au taleitaka meu wasea vei ira eso tale na ka me baleti koya, kei na nona inaki me baleti keda. Noqu isausau tarava meu painia. Au vinakata meu vukei ira na mataveitacini ena ivavakoso, meu dauveiqaravi tale ga ni ivavakoso. Noqu isausau levu meu lai veiqaravi e Peceli. Au dau vinakata tu qori me tekivu mai na gauna au lai sarasara kina ena valenivolavola ni tabana e Lviv ena 2018.”

E tiko mai Kyiv o Olena, e dautukutuku bera ni papitaiso ena 2011. E tini na yabaki nona sega ni toso tu vakayalo. Ena 2020, ratou qiriti koya na qase ni ivavakoso, e soli tale ga vua na brochure Mo Lesu Vei Jiova. E kaya: “Au vulica tale na iVolatabu, qai tiko ena soqoni. Ia sa mai cegu tu qori ni oti toka e dua na gauna. Ni yaco na ivalu, e sauma o Jiova na noqu masu, au vakila ni taqomaki au, e lomani au, e vakacegui au tale ga. Au dro i Romania qai sotavi ira na iVakadinadina i Jiova. Na nodra loloma kei na nodra veikauaitaki na mataveitacini, e vaka ga e ubi au o Jiova ena dua na itutuvi.” E papitaiso o Olena ena ika24 ni Julai. E kaya: “Au vakavinavinakataki Jiova ena nona vosovoso tiko mai. Qo au sa qai kila niu ‘rawata na ka kece ena vuku i koya e vakaukauataki au.’”—Filipai 4:13.

Me yacova mai na ika2 ni Okosita 2022, qo na itukutuku e tauri rawa mai Ukraine. Na iwiliwili qo e tauri rawa mai vei ira na mataveitacini. Me vaka ni dredre tiko na veitaratara ena vanua kece o Ukraine ena rawa ni toso i cake na iwiliwili.

• Mate e le 43 na dautukutuku

• Mavoa e le 97 na dautukutuku

• Tokitaki e le 22,568 na dautukutuku

• Vakarusai e 586 na vale

• Vakacacani vakalevu e 613 na vale

• Vakacacani vakalailai e 1,632 na vale

• Vakarusai e 5 na Vale ni Soqoni

• Vakacacani vakalevu e 10 na Vale ni Soqoni

• Vakacacani vakalailai e 37 na Vale ni Soqoni

• Sa veivuke tiko e Ukraine e 27 na Komiti ni Vakacoko (DRC)

• Era veivuke tiko na DRC vei ira na 53,836 na dautukutuku ena vanua mera taqomaki kina

• Era dro e 24,867 na dautukutuku ena so tale na matanitu, ra qai vukei vei ira na tacida e kea