Na levu ni bomu e vakacabotetaki ena so na vanua e Ukraine e vakacacana se vakarusa sara ga e levu na gaunisala, wavu kei na vanua e buli kina na livaliva. Dina ni sega na livaliva, e sega ni tarova qori nodra tiko ena soqoni na tacida kei na nodra vakaitavi ena veika vakayalo.

O Anastasia kei Debora rau painia tiko e Kyiv. A boko nodrau livaliva me rauta ni 12 na aua. Rau mani qara na gauna me jaji kina nodrau iyaya vakalivaliva, rau vakayagataka tale ga na data me rau sema kina ena soqoni. Levu na gauna ni oti na soqoni, sa dau malumu tale ga na kaukaua ni internet.

Na boko tale ga ni livaliva e lai vakaleqa na misini e dau vakatakata na lomanivale. Eso gona na tacida era vakayagataka na idini (generator) me rawa kina nodra livaliva, me vakatakata tale ga nodra lomanivale. Eso tale era toki vei ira na wekadra e tiko vei ira na misini ni katakata. Eso tale era sa vosota ga na batabata. Era kalougata e levu na tacida e vakatakatai nodra vale ena kasi (gas), ni boko na livaliva ena katakata tiko nodra vale.

O Iryna e painia tiko e Frankivsk. E saga me donu tiko ga nona rai, e kaya: “Au saga meu kua ni vakasamataka na ka au sega ni rawata, meu kauaitaka ga na siga yadua. Au sa dau vakasamataka ga na ka meu cakava ni boko na livaliva, me download tale ga na ivola vakaivolatabu au vinakata.”

Era sotava na tacida e Ukraine e levu na ituvaki dredre, ia era ogaoga tiko ga ena nodra veika vakayalo. Eda nuidei ni o Jiova ena vakalougatataki ira tiko ga ena nodra “caka vinaka.”—Kalatia 6:9.

Me yacova mai na ika6 ni Tiseba 2022, qo na itukutuku e tauri rawa mai Ukraine. Na iwiliwili qo e tauri rawa mai vei ira na mataveitacini. Me vaka ni dredre tiko na veitaratara ena vanua kece o Ukraine, ena rawa ni toso i cake na iwiliwili.

• Mate e le 47

• Mavoa e le 97

• Tokitaki e le 11,537

• Vakarusai e 590 na vale

• Vakacacani vakalevu e 645 na vale

• Vakacacani vakalailai e 1,722 na vale

• Vakarusai e 7 na Vale ni Soqoni

• Vakacacani vakalevu e 19 na Vale ni Soqoni

• Vakacacani vakalailai e 68 na Vale ni Soqoni

• Sa veivuke tiko e Ukraine e 27 na Komiti ni Vakacoko (DRC)

• Era veivuke tiko na DRC vei ira na le 54,212 na dautukutuku ena vanua mera taqomaki kina

• Era dro e le 26,811 na dautukutuku ena so tale na matanitu, ra qai vukei vei ira na tacida e kea