Ena Feperueri 2022, e rauta ni 3,000 nodra vale na tacida e vakacacani se vakarusai ena ivalu e Ukraine. Ena Okosita 2022, ena nodra veidusimaki na Komiti ni Tabana ni Vakacoko kei na Tabana ni Tarataravaki e Qarava na valenivolavola ni tabana, era vakavinakataka na tacida e Ukraine na vale e vakacacani ena vanua e sega ni ririkotaki kina na bula. E sosomitaki na dela ni vale kei na katubaleka e vakacacani, kei na so tale na ka lalai. Ni vakarusai na vale ena so na vanua, e veisautaki na qaraji se na vale lailai me dua na vale. Me yacova mai qo sa tara oti e 37 na tarataravaki, e 48 tale e se caka tiko.

E ka ni sasaga toka na tarataravaki ena gauna dredre qori. Ia era bole ga na tacida mera veivuke ena vakacoko. O Sister Svitlana e yabaki 70, e tiko e Velyka Dymerka ena yasayasa o Kyiv. E kaya: “E sega vei au na ilavo meu vakavinakataka kina na dela ni noqu vale kei na lalaga. Au kurabui nira gole mai na tacida ra qai vakavinakataka noqu vale ena loma ni tolu ga na siga. Dua na ka noqu vakavinavinakataki Jiova.”

O Sister Nadiia e tiko e Horenka ena yasayasa o Kyiv. E kaya ni veivuke vakalevu ena cakacaka vakavunau na veivuke ena vakacoko. E kaya: “E ivakadinadina vei ira e levu na veivuke e caka qo. Eso au sega ni kilai ira era tukuna sara ga ni laurai vei keda na loloma dina. Era sega gona ni tadra nira mai vukei au na mataveitacini.”

Eso mada ga e vakarusai na nodra vale era veivuke tale ga ena vakacoko me vakai rau na veiwatini o Yevhen kei Tetiana. A vakarusai na nodrau vale ena gasaukuro. Rau sega ni via vakasamataka vakalevu na veika rau vakayalia, ia rau gugumatua me rau vukei ira na vo ni mataveitacini. E kaya o Yevhen: “Keirau vinakata me keirau vukei ira eso tale, qori e vukei keirau me keirau vosota na ituvaki keirau sotava.”

E va tale ga qori na ka e cakava e dua na tacida yalewa o Lidiia e tiko e Hostomel ena yasayasa o Kyiv. Oti nodra vakavinakataka na tacida na nona vale, e vinakata tale ga me veivuke ena vakacoko. E kaya: “E le 16 na tacida era mai vakavinakataka na noqu vale ena loma ni rua na macawa. E vaka ga au tu ena vuravura vou. Au vinakata tale ga meu vukei ira eso tale.”

E gole e dua na lewe ni Komiti ni Tabana e Ukraine ena vanua e caka tiko kina na tarataravaki me lai vakayaloqaqataki ira na tacida e vakarusai nodra vale. E kaya: “E vakasakiti na nodra veilomani na mataveitacini e Ukraine. Ia na ivalu qo e vakavolekati keda dina. E veiuqeti nida raica nodra vukei na tacida qo e uqeti ira sara ga mera gugumatua ena cakacaka vakavunau. Me vaka e tukuni ena 2 Korinica 9:12, e ‘vakacaucautaki tale ga kina vakalevu na Kalou.’”

Me yacova mai na ika20 ni Tiseba 2022, qo na itukutuku e tauri rawa mai Ukraine. Na iwiliwili qo e tauri rawa mai vei ira na mataveitacini. Me vaka ni dredre tiko na veitaratara ena vanua kece o Ukraine, ena rawa ni toso i cake na iwiliwili.

• Mata e le 47

• Mavoa e le 97

• Tokitaki e le 11,477

• Vakarusai e 590

• Vakacacani vakalevu e 645 na vale

• Vakacacani vakalailai e 1,722

• Vakarusai e 7 na Vale ni Soqoni

• Vakacacani vakalevu e 19 na Vale ni Soqoni

• Vakacacani vakalailai e 68 na Vale ni Soqoni

• Sa veivuke tiko e Ukraine e 26 na Komiti ni Vakacoko (DRC)

• Era veivuke tiko na DRC vei ira na le 54,212 na dautukutuku ena vanua mera taqomaki kina

• Era dro e le 26,892 na dautukutuku ena so tale na matanitu ra qai vukei vei ira na tacida e kea