Era marautaka na tacida e Ukraine ni sa rawa nira vakaitavi tale ena vunau e matanalevu, e vuavuaivinaka tale ga na nodra cakacaka. Era kaya na ivakatawa ni tabacakacaka kei ira na qase ni ivavakoso e kea, e levu era marau nira raica tale noda qiqi ni vunau. Era diva tale ga meda lesu tale yani ena nodra itikotiko.

O Tatiana e dua na tacida yalewa e tiko ena ivavakoso e Serhiivka, ena yasayasa o Odesa. Ni bera ni veitauvi na matedewa, a tiko eso na nona tataleitaki. E mani nanuma me lesuvi ira tale, e kaya: “Au raica sara ga ni vakalougatataka o Jiova noda vakaitavi tale ena cakacaka vakaitalatala.” E sikova o Tatiana e dua na yalewa a sega ni via vuli iVolatabu ni bera na matedewa. Ia qo e vakadonuya me veivosakitaka na ulutaga vakaivolatabu, e vinakata tale ga me vulica na iVolatabu. E kaya o Tatiana: “Au via lesuvi ira kece tale na tataleitaki, meu sureti ira tale ga mera vulica na iVolatabu!”

O Yevheniy kei Lilia rau tiko mai Mariupol, e Ukraine. Rau dro laivi mai na nodrau vale, qo rau sa tiko ena vanua e sega ni yaco kina na tikoyavavala e Ukraine. Rau sa vakaitavi wasoma tiko ena cakacaka vakavunau. Rau kaya qori e vukei rau me rau kua ni vakasamataka na ituvaki dredre rau sotava. Rau kaya: “Keirau kila ni na veisau vakalevu na neirau bula. E dredre me tauyavutaki na bula ena dua na vanua vou, ia nuidei ni sega ni lekaleka na liga i Jiova me vukei keirau. E tokoni keirau na yalona tabu, era vukei keirau tale ga na tacida me keirau matau ena vanua vou.”

Era qoroi na tacida ena nodra ivakaraitaki vinaka ena so tale na vanua e Ukraine. Kena ivakaraitaki, eso na tacida ena siti o Mykolaiv era veivuke ena dua na isoqosoqo e qarava na ka ni veivuke e veiyasa i vuravura. Era vakavinakataka e dua na vale, qai tuvanaka na ka ni veivuke e maroroi kina. Era ripeataka na paipo, vakarautaka na vata ni iyaya, ra qai wasewasea na iyaya ni veivuke. Dua na ka nona luluvu na marama e cakacaka ena isoqosoqo qori ni raica na ka era cakava na tacida. E kaya: “Au sega sara ga ni namaka ni oni na cakava qo.”

Dina nira sotava tiko na tacida e Ukraine na veika dredre, ia era marau tu ga nira vakaitavi ena cakacaka vakavunau, ra qai “caka vinaka” tiko ga.—Kalatia 6:9.

Me yacova mai na ika13 ni Julai 2022, qo na itukutuku e tauri rawa mai Ukraine. Na iwiliwili qo e tauri rawa mai vei ira na mataveitacini. Me vaka ni dredre tiko na veitaratara ena vanua kece o Ukraine ena rawa ni toso i cake na iwiliwili.

• Mate e 42 na dautukutuku

• Mavoa e 97 na dautukutuku

• Tokitaki e 28,683 na dautukutuku ena vanua e sega kina na ivalu

• Vakarusai e 524 na vale

• Vakacacani vakalevu e 588 na vale

• Vakacacani vakalailai e 1,554 na vale

• Vakarusai e 5 na Vale ni Soqoni

• Vakacacani vakalevu e 10 na Vale ni Soqoni

• Vakacacani vakalailai e 36 na Vale ni Soqoni

• Sa veivuke tiko e Ukraine e 27 na Komiti ni Vakacoko (DRC)

• Era veivuke tiko na DRC vei ira na 52,947 na dautukutuku ena vanua mera taqomaki kina

• Era dro e 23,863 na dautukutuku ena so tale na matanitu, ra qai vukei vei ira na tacida e kea