E ka ni rarawa ni mai takali e rua na tacida yalewa ena kacabote ni bomu ena siti o Mariupol. Gauna qo, era sega ni rawa nira dro laivi mai na siti e sivia e 2,000 na tacida ena kaukaua ni veiraravui. Ena vica na siga sa oti, era dro rawa e rauta ni 150 na tacida. Era saga na tacida era lewe ni Komiti ni Vakacoko mera vakauta na ka ni veivuke i Mariupol, ia e qai vanalaki na nodra motoka kei na so tale na motoka e vodo tiko kina na ka ni veivuke. E kacabote e dua na bomu ena yasa ni dua na Vale ni Soqoni, kei na dua na Vale ni Soqoni Levu. Era vakaruru tiko ena dua na rumu ena tabavale e ra ni Vale ni Soqoni e rauta ni 200 na tacida. Era sega ni mavoa, ia e vakacacani na nodra motoka. Qori e vakadredretaka sara ga na nodra dro laivi mai na siti.

E kaya e dua na qase ni ivavakoso (taba tiko i ra) a dro laivi mai Mariupol kei na nona vuvale: “E vakarusai neitou vale, sega na cakacaka, e sega ni rawa tale ga ni keitou veitaratara kei ira na itokani. Ni bera na ivalu, e rawa ni keitou yaco ena vanua keitou lako kina ena loma ni dua ga na siga. Ia qo e tauri keitou e rauta ni ono na siga. Ni keitou gole tiko ena neitou motoka, keitou raica nira kuvu tiko ena yasa ni gaunisala na bomu era se bera ni kacabote. Gauna keitou dro tiko kina era vukei keitou na mataveitacini ena ka me keitou kania, kei na vanua me keitou moce kina. Keitou vakila sara ga na nona veitaqomaki na Tamada dauloloma o Jiova. Keitou vakadeitaka kina ni dodonu ga me keitou nuitaki koya vakatabakidua.”

Eso na tacida e Ukraine era dro ena so na vanua vakaUrope mera lai taqomaki kina. Kena ivakaraitaki, e dua dauveiqaravi ni ivavakoso, na watina kei na tolu na luvedrau, dua e yabaki 7, dua e yabaki 11, e dua tale e yabaki 16. Ratou dro i Potukali vei ira na wekadratou era tiko ena dina. Ratou lai wawa tu ena iyala ni vanua me 11 na aua. Oti ratou qai lakova e sivia e 4,000 na kilomita ena loma ni va na siga me ratou yaco vei ratou na wekadratou. Ni ratou yaco yani ratou donumaka na soqoni. Dina ni ratou sega ni kila na vosa vakaPotukali, ia ratou dei tiko ga ena nodratou ituvatuva vakayalo, ratou sema tale ga ena soqoni. Ratou sotava na veika dredre, ia era qoroya na tacida na nodratou mamarau.

E kaya e dua tale na tacida yalewa e dro i Jamani kei ratou na nona vuvale: “E vakayaloqaqataki keitou na wili iVolatabu, keitou saga me donu tiko ga neitou rai, qai vakasamataka na inuinui totoka ena gauna se bera mai. Keitou vakila sara ga nona veitokoni o Jiova ni vakayagataki ira na mataveitacini. Era vukei keitou ni keitou tiko e Ukraine, e Hungary, kei na neitou tiko qo e Jamani!”

Eda vakadeitaka ni o Jiova e tokoni ira tiko na mataveitacini e Ukraine.—Same 145:14.

Me yacova mai na ika16 ni Maji 2022, qo na itukutuku e tauri rawa mai Ukraine. Na iwiliwili qo e tauri rawa mai vei ira na mataveitacini. Me vaka ni dredre tiko na veitaratara ena vanua kece o Ukraine, ena rawa ni toso i cake na iwiliwili:

• Mate e 4 na dautukutuku

• Mavoa e 19 na dautukutuku

• Dro e 29,789 na dautukutuku ena so tale na vanua e Ukraine e sega ni caka kina na veiraravui

• Vakarusai e 45 na vale

• Vakacacani vakalevu e 84 na vale

• Vakacacani vakalailai e 366 na vale

• Vakacacani e 16 na Vale ni Soqoni

• Sa veivuke tiko e Ukraine e 27 na Komiti ni Vakacoko (DRC)

• Era veivuke na DRC vei ira na 20,981 na dautukutuku ena vanua mera taqomaki kina

• Era dro e 11,973 na dautukutuku ena so tale na matanitu, ra qai vukei vei ira na tacida e kea