E ka ni rarawa ni so tale na tacida era sa takali ena veivaluvaluti e yaco tiko e Ukraine. Me yacova mai qo, sa 28 na tacida era sa takali.

Ena imatai ni vica na macawa e ripotetaka na tabana ni itukutuku e vuravura raraba, ni yaco vakalevu na ivalu ena veitauni volekati Kyiv. E rauta ni 4,900 na dautukutuku era tiko ena yasayasa qori, e sivia ni 3,500 vei ira qori era sa dro ena dua tale na vanua.

Qo eso na nodra vakaraitaki na tacida e dei tiko ga na nodra vakabauta nira sotava na ituvaki dredre qori.

O Oleksandr e dua na qase ni ivavakoso e tiko ena tauni o Makariv, a dro ena loma ni vanua kei Ukraine. E sega ni tarai ratou rawa e va na tacida ena nodratou iwasewase lailai, qai dua na ka nona leqataki ratou. Dina ni yaco tiko na ivalu ena vanua ratou tiko kina, e vakatulewataka ga o Oleksandr me lai raici ratou. E kaya: “O Jiova e vakamareqeti ira na nona dauveiqaravi. . . . Niu yaco ena nona vale e dua vei ratou na tacida, au raica ni sa vakarusai ena kacabote ni bomu. E sogo tu na katuba ni rumu ena tabavale e ra, qai sega ni dua e sauma mai noqu kaci. Dua na ka noqu lomaleqa.” E qai basuka o Oleksandr na katuba qori, qai raici ratou na tacida kei na so na wekadra era sega ni tiko ena dina era vakaruru toka ena rumu qori.

E dua vei ratou na tacida qori o Yaroslav, e kaya ni ratou sa toka ena rumu qori me walu na siga. E kaya: “Keimami na yadua na bilo wai, kei na vica na bisikete e veisiga. Ia keimami wilika vata na iVolatabu, ivola vakaivolatabu, masu qai veivakayaloqaqataki. Niu rogoca nona kacivi au o Oleksandr, au nanuma nira sa mai kauti au na sotia meu lai vakamatei. . . . [Ia] e qai vukei keitou o koya. Keitou vakavinavinakataki Jiova ni vakarautaki ira na tacida era lomani keda vakalevu, ra qai bolea e levu na ka dredre mera veivuke.”

Ena ika17 ni Maji, rau kauta o Pylyp kei na dua na tacida tagane eso na kakana vei ira na tiko ena tauni o Borodianka. Ni rau yaco yani, e taura na sotia na motoka nei Pylyp kei na kakana. E vesuka na ligadrau, ubia na matadrau qai kauti rau ena dua na rumu lailai ena ruku ni tabavale e ra, ratou vesu tu kina e vitu na tagane. Oti e rua na siga, rau kau ena dua tale na rumu rau qai mokulaki ena bogi. E kaya o Pylyp: “Au nanuma ga niu sa na mate. Dua na ka noqu masuti Jiova meu yalodina tiko ga.”

Ni mokulaki tiko o Pylyp, e masulaki ira vakadomoilevu na tacida yalewa itabaqase e sega tu na kedra, me taqomaki nona vuvale, qai vakavinavinakataki Jiova ena nona yalodina tiko mai. E kauti koya lesu na yadra ena vanua e vesu tu kina, qai masulaki ira tiko ga na sotia mera kila nira sega ni tamata rerevaki na tacida. Rau mani vunau sara na tacida vua na yadra. Rua na siga na nodrau vunau tiko vei ira kece na lai yadra tiko yani. A taleitaka tale ga e dua na kaivesu na ka dina rau wasea tiko, qai dua na ka nona vakavinavinakataki rau. Ena ika27 ni Maji rau sere na tacida, kei na tagane e tataleitaki.

O Svitlana e dua na tacida goneyalewa mai Bucha. Rua na macawa nona sega ni rawa ni dro laivi mai na vanua e caka tiko kina na ivalu. E kaya: “Se qai vakadua meu vakila na vakacegu e solia o Jiova. Ni tiko vei keda na vakacegu ni Kalou, e sega ni kena ibalebale nida na kila na ka meda cakava. Ia nida sotava na ituvaki leqataki, ena qai laurai kina na noda nuitaki Jiova vakatabakidua.”

Ni dro tiko o Svitlana ena vanua me taqomaki kina, e vunau sara vua e dua na marama kei na vugona. Ratou yaco bula kece yani ena vanua qori, ra qai tavaki ratou tu mai e dua na vuvale iVakadinadina i Jiova. Ratou mani vakaicili kece vei ratou na vuvale qori ena bogi ya. Ena siga tarava, e kaya na marama ya ni via tiko ena soqoni, e vinakata tale ga e dua na iVolatabu kei na ivola vakaivolatabu. Rau se dau veitaratara tiko ga kei Svitlana.

Me yacova mai na ika12 ni Epereli 2022, qo na itukutuku e tauri rawa mai Ukraine. Na iwiliwili qo e tauri rawa mai vei ira na mataveitacini. Me vaka ni dredre tiko na veitaratara ena vanua kece o Ukraine, ena rawa ni toso i cake na iwiliwili.

• Mate e 28 na dautukutuku

• Mavoa e 48 na dautukutuku

• 40,778 na dautukutuku era dro ena dua tale na vanua

• Vakarusai e 278 na vale

• Vakacacani vakalevu e 268 na vale

• Vakacacani vakalailai e 746 na vale

• Vakarusai e 1 na Vale ni Soqoni

• Vakacacani vakalevu e 9 na Vale ni Soqoni

• Vakacacani vakalailai e 26 na Vale ni Soqoni

• Sa veivuke tiko e Ukraine e 27 na Komiti ni Vakacoko (DRC)

• Era veivuke tiko na DRC vei ira na 41,974 na dautukutuku ena vanua mera taqomaki kina

• Era dro e 18,097 na dautukutuku ena so tale na matanitu, ra qai vukei vei ira na tacida e kea