Dina ni se yaco tiko na ivalu e Ukraine, ia era sasaga vakaukaua na tacida ena valenivolavola ni tabana e Ukraine mera veivakacegui qai vakayaloqaqataki ira na tacida era dro ena so tale na vanua. Qori e vukei ira me dei tiko ga nodra veiwekani kei Jiova. E dua na lewe ni Komiti ni Tabana e sikovi ira e rauta ni le 30 na mataveitacini era dro ena ra kei Ukraine, ra qai vakaicili tiko ena Vale ni Soqoni ena siti o Uzhgorod. Oti nona veisiko e kaya e dua na tacida yalewa e vakaicili tiko e kea: “E vaka ga e taura na ligaqu o Jiova qai mokoti au.”

Era cakacaka tale ga vakaukaua na tacida mera vakayaloqaqataki ira e rauta ni 100 na tacida yaloqaqa era veiqaravi tiko ena 27 na Komiti ni Vakacoko (DRC). E kaya o Ihor e veivuke tiko ena DRC: “Keirau sa dro laivi mai vakaveiwatini ena neirau vale qai tiko ena dua tale na vale ena gauna au lesi kina meu veivuke ena DRC. Ni keirau vakila na oca qai wawale, ena saga e dua na lewe ni Komiti ni Tabana me sikovi keirau mai qai vakarogoci keirau vinaka. Keirau raica ni kauaitaki keirau dina. Nida sotava na ituvaki eda sega ni lewa rawa, da sega ni kila tale ga na ka meda cakava, meda kerea ga nona veidusimaki o Jiova ena masu. Eda dau vakadinadinataka sara ga na nona veivuke.”

Me baleta na Vale ni Soqoni era tiko volekata na vanua e yaco vakalevu tiko kina na ivalu, e 4 sa vakarusai vakadua, 8 e vakacacani vakalevu, e 33 e vakacacani vakalailai.

Me yacova mai na ika17 ni Me 2022, qo na itukutuku e tauri rawa mai Ukraine. Na iwiliwili qo e tauri rawa mai vei ira na mataveitacini. Me vaka ni dredre tiko na veitaratara ena vanua kece o Ukraine, ena rawa ni toso i cake na iwiliwili.

• 37 era sa mate

• 74 era mavoa

• 45,253 era dro ena dua tale na vanua

• Vakarusai e 418 na vale

• Vakacacani vakalevu e 466 na vale

• Vakacacani vakalailai e 1,213 na vale

• Vakarusai e 4 na Vale ni Soqoni

• Vakacacani vakalevu e 8 na Vale ni Soqoni

• Vakacacani vakalailai e 33 na Vale ni Soqoni

• Sa veivuke tiko e Ukraine e 27 na Komiti ni Vakacoko (DRC)

• Era veivuke tiko na DRC vei ira na 48,806 na dautukutuku ena vanua mera taqomaki kina

• Era dro e 21,786 na dautukutuku ena so tale na matanitu, ra qai vukei vei ira na tacida e kea