E veivuke tiko ga na valenivolavola ni tabana e Ukraine, kei na 27 na Komiti ni Vakacoko (DRC) vei ira na tacida era tokitaki ena veivanua qori. Tekivu mai na gauna e yaco kina na ivalu, e sivia ni 250 na tani na ka ni veivuke e vakau mai Poladi, me vaka na kakana, isulu kei na iyaya ni tiko bulabula. E vakau tale ga e sivia e 80 na tani na kakana vei ira na tacida era tiko ena vanua e taqomaki vinaka e Ukraine.

E vola e dua na tacida yalewa o Valentina mai Kyiv, ena nona vukei vei ira na DRC: “E rerevaki na tiko ena siti ni tekivu na ivalu. Au mani toki ena dua na tauni lailai ena yasayasa o Cherkasy. Sa sivia qo e rua na vula noqu tiko e ke. Dua na ka nodra kauaitaki au na mataveitacini ena ivavakoso qo. Era kauta mai eso na kateni na kakana, kei na iyaya ni tiko bulabula. E tarai au dina niu raica nodra veivuke. Ena dua na loma ni kateni e tiko kina na nona droini o Blanca e dua na gone yabaki va, kei na dua na kad e rokataki tu . . . Au na maroroya tiko me rawa niu nanuma kina na nodra dauveikauaitaki. Dua na ka noqu vakavinavinakataki ira na mataveitacini qai vakabibi o Jiova.”

E vola tale ga o Valentyna, e dua tacida yalewa itabaqase e yabaki 83 mai Sieverodonetsk: “Au a tiko taudua ena gauna e yaco kina na ivalu. E dua ga na luvequ tagane, a mate ni bera na ivalu. E vakarerevaki ni kacabote tu ga na bomu ena siga taucoko. E sega na wai, livaliva, na kasi, e berabera tale ga na internet. Au vakavinavinakataki ira gona na tacida tagane era bolemate mera mai vukei au.”

E tomana: “Oti era kauti au kei na rua tale na tacida yalewa rau lokiloki ena siti o Dnipro. E sega ni yaco na tikoyavavala ena siti qori. E vaqarai sara na vanua meu vakaicili kina. Gauna qo, au sa tiko vei ratou dua na vuvale ratou tiko ena dina, qai dua na ka nodratou kauaitaki au. Vaka ga keitou vuvale vata. Ratou solia mada ga vei au e dua na talevoni meu rawa ni sema qai vakaitavi ena soqoni. Au na sega vakadua ni guilecava nodra kauaitaki au na mataveitacini.”

Eda marau qai vakavinavinakataka na Tamada vakalomalagi dauloloma o Jiova, na nona karoni ira na mataveitacini e Ukraine mera ‘kua ni leqa ena ka vinaka.’—Same 34:10.

Me yacova mai na ika7 ni June 2022, qo na itukutuku e tauri rawa mai Ukraine. Na iwiliwili qo e tauri rawa mai vei ira na mataveitacini. Me vaka ni dredre tiko na veitaratara ena vanua kece o Ukraine, ena rawa ni toso i cake na iwiliwili..

• Mate e 42 na dautukutuku

• Mavoa e 82 na dautukutuku

• Tokitaki e 46,145 na dautukutuku

• Vakarusai e 469 na vale

• Vakacacani vakalevu e 540 na vale

• Vakacacani vakalailai e 1,405 na vale

• Vakarusai e 5 na Vale ni Soqoni

• Vakacacani vakalevu e 8 na Vale ni Soqoni

• Vakacacani vakalailai e 33 na Vale ni Soqoni

• Sa veivuke tiko e Ukraine e 27 na Komiti ni Vakacoko (DRC)

• Era veivuke tiko na DRC vei ira na 50,663 na dautukutuku ena vanua mera taqomaki kina

• Era dro e 22,995 na dautukutuku ena so tale na matanitu, ra qai vukei vei ira na tacida e kea