Ena ika24 ni Feperueri 2022, e valuti Ukraine na matanitu o Rusia. E sivia na 129,000 na tacida wili kina na luvedra era tiko e Ukraine. E tuvanaka na valenivolavola ni tabana e 27 na Komiti ni Vakacoko (DRC) mera vukei ira na tacida. Era vakaraitaka tale ga na tacida na loloma vaKarisito nira veivukei ra qai veivakayaloqaqataki vakamataveitacini, era cakava tale ga qori vei ira na tiko veitikivi.

E levu na tacida era tiko ga e Ukraine, ia eso tale era vakatulewataka mera dro ina dua tale na matanitu. O ira na tacida era dro qori era lai wawa tale ena dua na laini e rauta ni 30 na kilomita na kena balavu. E rauta ni tolu ina va na siga nodra wawa tiko me rawa ni soli vei ira na ivolatara mera biuti Ukraine. O ira na tacida era toka voleka e kea era sa qai vakarautaka vei ira eso na ka ni veivuke, kei na kakana. Nira yaco na tacida ena vanua era dro kina, era waraki ira tu mai na mataveitacini ena vanua ya, ra qai taura tu na ivakatakilakila ni jw.org. Era tu vakarau tale ga mera veivuke qai veivakacegui.

• Ka ni rarawa ni mate e dua na tacida tagane didivara e Kharkvik ena imatai ni Maji 2022. E mavoa tale ga vakaca o watina ena kacabote ni bomu

• Mavoa e 3 na tacida yalewa

• Sivia ni 5,000 na dautukutuku era dro ena dua tale na vanua

• Vakarusai e 2 na vale

• Vakacacani vakalevu e 3 na vale

• Vakacacani vakalailai e 35 na vale

• Vakacacani e 2 na Vale ni Soqoni

• Levu na tacida e boko nodra livaliva, leqa nodra misini ni katakata kei na talevoni. E lailai tale ga na wai ni gunu

• Tuvanaki e 27 na Komiti ni Vakacoko e Ukraine

• Era veivuke na Komiti ni Vakacoko vei ira na 867 na dautukutuku ena kena vakarautaki na vanua mera taqomaki kina

• Era cakacaka vata na Komiti ni Vakacoko mera vakarautaka na ka era gadreva na tacida, me vaka na kakana kei na wai

Na iwiliwili e toka i cake e tauri mai na dua na ripote.

Meda masulaka nira na vakaraitaka tiko ga na tacida na vuku kei na yalomatua, mera vosota kina na veika tawanamaki kei na ituvaki dredre, ra qai vakaraitaka tale ga na loloma vakamataveitacini.—Vosa Vakaibalebale 9:10; 1 Cesalonaika 4:9.