Rau vakila o Sister Liudmyla Mozul kei Sister Kateryna Rozdorska, na mosi kei na rarawa e vu mai ena ka e yaco tiko e Ukraine. Ia rau vosota rawa ga ena veivuke i Jiova. E mate ena veivaluvaluti o Petro Mozul na wati Sister Liudmyla Mozul, kei Dmytro Rozdorskyi na wati Sister Kateryna Rozdorska. Me yacova mai qo, e ka ni rarawa nira sa takali e 34 na tacida.

Rau papitaiso o Petro kei Liudmyla ena 1994. Sa 43 na yabaki na nodrau vakamau.

E kaya o Liudmyla: “Era dau qiri mai e veisiga na mataveitacini mera vakayaloqaqataki au. E tarai au tale ga na vosa ni veinanumi ratou vola mai na valenivolavola ni tabana e Ukraine.”

A tekivu na ivalu ena ika24 ni Feperueri 2022. O Petro e dauveiqaravi tiko ena ivavakoso vosa vagalu. A mate ena imatai ni Maji 2022, ni ratou sasaga tiko vakavuvale me ratou dro laivi mai na siti o Kharkiv.

Oti e vica na siga na vakacabotetaki bomu, era veivukayaki na waqavuka ni valu ra qai vakacaca ena siti. Ena loma ni 30 na miniti ratou tawana o Petro kei na nona vuvale na ka ratou gadreva, oti ratou biubiu. Rau vodo o Petro kei Liudmyla ena dua na motoka. Dua tale na motoka e vodo kina o Oleksii na luvedrau, kei watina o Maryna. E kaya o Liudmyla: “Ni keitou lako tiko era vakalutu bomu na waqavuka ni valu, qai yavavala na motoka ena kaukaua ni kacabote.”

E yabaki 67 o Petro, qai saga me levea na lori e draivataka tiko o Oleksii, ia e qai mavoa vaka ca. Rau kau sara kei Liudmyla i valenibula, e qai lai mate e kea. E mavoa na yavai Liudmyla kei na ketena ni lauta na kaukamea. Rau sega ni mavoa o Oleksii kei Maryna. Oti e tolu na siga nona suka mai valenibula o Liudmyla e qai kila ni sa mate o Petro.

E kaya o Liudmyla: “Au vakila tu ga na vakacegu niu vakasamataka vakalevu na nona loloma o Jiova, kei na veika totoka e yalataka tu. Au nuidei niu na sotavi watiqu tale ena vuravura vou, au rai vakanamata tale ga ena gauna marautaki ya.”

Sa walu na yabaki nodrau vakamau o Dmytro kei Kateryna. Ni se cakacaka tiko o Dmytro, na iotioti ni vosa a tukuna vei watina: “Au sa vakarau lako yani qo i vale.”

Ena ika8 ni Maji 2022, ni oti e vica na aua e qiriti Kateryna e dua rau cakacaka vata kei Dmytro, e kaya ni butuka o watina na vanua e bulu tu kina na bomu. A kau i valenibula, e qai takali ni oti e lima na aua nona qaravi vakavuniwai.

Ni rogoca oti qori o Kateryna, e kaya: “Na bogi ni siga ya, au vakila ni taura na ligaqu o Jiova qai keveti au. Au vakila niu volekati koya vakalevu.”

E yabaki 28 o Dmytro, a papitaiso ena 2006, a qase ni ivavakoso tu ena yasayasa o Donetsk e Ukraine.

Oti na vunau ni veibulu, e gole o Kateryna me rauta ni 12 na aua ena vanua me taqomaki kina. E kaya: “Dua na ka nodra vakayaloqaqataki au na tacida ena veivanua kece e Ukraine, kei na so tale na vanua. Au vakila na nodra loloma, au sega kina ni rarawa vakalevu.”

E kaya o Kateryna: “E vakacegui au na cakacaka vakavunau . . . . Eso na gauna niu rarawa, au dau vakasamataka eso na tikinivolatabu me vaka na Filipai 4:6,7.”

Eda nuidei ni o Jiova ena vakayaloqaqataki ira, qai vakacegui ira tiko ga na tacida e takali na wekadra ena ivalu mai Ukraine.—Same 61:1-3.