Ena ika24 ni Feperueri 2022, e vakayadrati au vakasauri e dua na rorogo levu. Au nanuma ga ni kurukuru baleta ni tau tiko na uca, ia qori na kacabote ni bomu.

Ena vinakati meu biubiu e vale niu tu sara tu ga ena lomadonu ni siti e Mariupol, e Ukraine. Na siga tarava au gole ena vale nei noqu bu e tiko ena taudaku ni siti. Keitou mani lai tiko e nona vale, o au, o tinaqu, kei na dua na tavalequ. A dede toka neitou tiko e keri, ia levu na gauna keitou moce tu ga ena tabavale e ra.

Dua na siga ni keitou tiko ena rumu qori, a lutu e dua na bomu ena neitou iteitei. Dua na ka na kena rogo levu. Au mani masu vagumatua vei Jiova. Oti e dua na macawa, keitou sa sega ni rawa ni tiko tale e kea. Keitou mani lesu tale ena loma ni siti me keitou lai vakaruru kina. Au kerei Jiova me taqomaki keitou, me rawa ni keitou dro ina siti.

Ena mataka na ika4 ni Maji, e sega ni dua na sitima e biuti Mariupol ni caka tiko kina na veiraravui. E mani tini na siga neitou lai vakaruru tu ena dua na vanua ni sarasara, kei na vica vata na drau na lewenivanua. Dua na ka na oso ni vanua qori. Keimami moce ena fuloa qai sega ni savasava. Keimami na laini tu me vica vata na aua ena vanua e vakarautaki kina na kakana, kei na waikatakata.

Dua na siga e kacabote na bomu volekata na vanua ni sarasara qori. Na kena kaukaua e kavoro kina na katubaleka, qai dua na ka na batabata ni lomanivale.

E vukei au vakalevu ena gauna dredre qori na italanoa kei Jope. Oti na kacabote ni bomu, au raica ni levu era taqaya. Au wilika sara na veika me baleti Jope ena iVolatabu, qori e vakacegui au dina. E vaka ga au dabe tiko e yasa i Jope qai kaya vua: “Au sa qai kila qo na ituvaki dredre o sotava!” E vakayalia o Jope na ka kece, nona vuvale, e tauvimate, e vakayalia tale ga na iyau. Ia au vakayalia ga na veika vakayago. E sega ni dua na leqa e yacovi ratou noqu vuvale, au qai bulabula vinaka. Au vakadinata kina ni sega ni ca sara na ituvaki au sotava. Au vakila sara ga kina na lomavakacegu.

Ena ika14 ni Maji, keitou rogoca eso era sa dro laivi mai na siti qori. Keitou mani nanuma me keitou dro tale ga. Keitou kunea e dua na lori me kauti keitou, kei na so tale era tu ena vanua ni sarasara.

E 20 na lori e veikau. Keitou veiosoosoti e le 14 ena dua na lori ni usa iyaya. Levu na gauna ni keitou lako tiko era kacabote na bomu e yasa ni lori. Dua na ka noqu masu vagumatua vei Jiova. Ni keitou sa via yawa toka mai na siti, e kele o draiva qai tabalaka na tagi. Baleta ni calata kece mai na vanua era bulu tu kina na bomu e gaunisala. Oti e rua na siga neitou dro, keitou qai rogoca ni kacabote na bomu ena vanua ni sarasara. Era qai mate kina e voleka ni 300 na lewenivanua.

Oti e 13 na aua, keitou yaco i Zaporizhia qori e dua tale na siti e Ukraine. Na siga tarava, keitou vodo ena dua na sitima e gole ena siti o Lviv. Dodonu me vodo ga kina e le va, ia keimami le 16 na vodo kina. E katakata na loma ni sitima. Au duri tu ga ena pasese meu rawa ni ceguva na cagi bulabula. Ena ika16 ni Maji, keitou yaco i Lviv era kidavaki keitou mai na mataveitacini. Keitou lai vakaruru ena Vale ni Soqoni me va na siga. Dua na ka noqu luluvu niu raica nodra veikauaitaki na mataveitacini. Qo e dua na iloloma mai vei Jiova.

Ena ika19 ni Maji, keitou biubiu e Ukraine qai gole e Poladi. Era kidavaki keitou tale e keri na mataveitacini. Era vakarautaka vei keitou na ka kece keitou gadreva. Keitou vakila na veilomani dina.

Au se qai yabaki 19, ia noqu sotava na ituvaki dredre qori au vulica kina ni bibi meda vaqaqacotaka na noda vakabauta ni bera nida sotava na leqa. Qori ena vukei keda meda yalodina. Keu sega ni dau vuli vakataki au ni bera na ivalu, ena dredre meu vosota na ituvaki qo.

O Jiova na Tama e dau veikauaitaki. Gauna kece au sotava kina na ituvaki dredre, au vakila ni qumia na ligaqu imatau qai taqomaki au. Au na vakavinavinakataki koya tu ga ena ka kece e cakava vei au.—Aisea 41:10.