Ena ika3 ni Seviteba 2019, e duavata kei ira na iVakadinadina i Jiova ena siti o Kryvyi Rih, Ukraine, na Mataveilewai me baleta na nodra dodonu na lewenivanua e Urope (ECHR). E kaya na Mataveilewai ni cala na ka e cakava na matabose ni siti o Kryvyi Rih, ni nakita nona sega ni vakadonuya mera tara na mataveitacini na nodra Vale ni Soqoni.

E kaya na Mataveilewai ni beca na matabose ni siti e rua na lawa era vauci kina na veimatanitu mai na veiyasa i vuravura. Na kena imatai, na Article 9 ena European Convention on Human Rights e taqomaka na dodonu ni vakasama, lewaeloma kei na lotu. Na kena karua, na Article 1 ena veidinadinati Nb. 1 ni European Convention on Human Rights, e solia na dodonu vei ira na lewenivanua mera volia se taukena na vale se na qele. E kaya tale ga na mataveilewai ni dodonu vua na matabose ni siti me sauma e rauta ni $7,768 na ilavo ni Merika ina rua na ivavakoso e taukena na qele qori. E soli vua na matanitu o Ukraine e tolu na vula me valataka na ka e kaya na mataveilewai ni kauta cake nona kisi ina mataveilewai levu ni ECHR.

E sivia ni 15 na yabaki nodra kerea na rua na ivavakoso e Kryvyi Rih me tara nodra Vale ni Soqoni. Ena ika9 ni Okosita 2004, era volia e dua na vale, e tara tiko ena qele e nona na matabose ni siti. Oti era sa qai kerea mera lisitaka e dua na qele me lima na yabaki me tara kina e dua na Vale ni Soqoni. E vakadonuya na matabose ni siti na nodra imatai ni kerekere ena ika28 ni Seviteba, 2005. E kaya tale ga na matabose ni siti vei ratou na tacida, ni na qai vakadonui ga me tekivu na tarataravaki ke ratou raica tale eso na vakailesilesi na nodratou kerekere.

E mani caka sara na peleni, era vakadonuya sara mai na dui vakailesilesi ni matanitu. E mani kerea sara na veivakadonui ni matabose ni siti ena ika23 ni Okosita, 2006. E dodonu vua na matabose ni siti me tukuna vei ira na mataveitacini ena loma ni dua na vula na veivakadonui, ia e qai sega ni cakava qori. E tukuna mada ga na mataveilewai ni rogokudru ni beca na lawa na matabose ni siti, ia e sega tiko ga ni solia na veivakadonui vei ira na mataveitacini. Era sa qai kerea na mataveitacini me rogoci tale nodra kisi ena so tale na mataveilewai, ia e qai sega ni rogoci. Ena ika13 ni Epereli 2010, era sa qai kerea na mataveitacini me rogoci na nodra kisi ena Mataveilewai me baleta na nodra dodonu na lewenivanua e Urope.

Eda marau ni duavata na ECHR kei ira na mataveitacini e Kryvyi Rih. Meda masulaka mada ga ni vakatulewa e cakava qo na ECHR, ena vakarawarawataka vei ira na vo ni mataveitacini mera tara na nodra Vale ni Soqoni ena vanua e vakatabui tu kina na galala me baleta na tarataravaki.—Same 118:5-9.