E rauta ni le 47,000 na tacida era tokitaki ena vuku ni ivalu e yaco tiko e Ukraine. E levu era dro ena vanua e sega ni yaco tu kina na ivalu e Ukraine. O ira na tacida era tiko ena veivanua qori era vakarautaka na isulu, kakana, na icili, kei na so tale na ka ni veivuke. Dina nira sotava tu na leqa vakailavo, ia era yalorawarawa mera veivuke.

Dua na tacida yalewa o Olha e tiko e Uman e Ukraine, e sega ni tiko ena dina o watina. Rau vakaicilitaki ira e le 300 na tacida ena imatai ni rua na vula e yaco kina na ivalu. Levu vei ira qori era moce ena dua ga na bogi ra qai toki tale ena dua na vanua. Levu na gauna dau qai kila ga o Olha ena lomaloma ni bogi nira sa vakarau yaco yani na tacida. Dua na gauna, e vakaicilitaki ira e le 22 na tacida. Na veika rau cakava qori e vukei Stanislav na luvedrau tagane e yabaki 18, me dau lomasavu. E dau moce ena fuloa me rawa nira vakayagataka nona rumu na tacida.

E kaya o Olha: “Dina ni keimami sotava tu na leqa, ia au se rawa ga ni vukei ira na mataveitacini. Qori e vakamarautaki au vakalevu.”

Rua na tacida o Andriy kei watina o Liudmyla, rau vakaicilitaki ira e le 200 na tacida ena loma ni lima na macawa. Dua na bogi, rau vakaicilitaki ira e le 18 na tacida. E kaya o Andriy: “Keirau muria na veidusimaki mai na valenivolavola ni tabana, keirau mani vakayagataka na vo ni kakana e tu vei keirau me keirau vakani ira kina na mataveitacini ena dua veimama na macawa. Eso na gauna nira biubiu na tacida, era dau biuta tu mai eso na kad kei na ilavo. Keirau qai vakayagataka na ilavo qori me voli kina na kakana vei ira na tacida keirau na vakarau vakaicilitaka. Era vakarautaka tale ga na Komiti ni Vakacoko na kakana, keirau sega gona ni leqa ena dua na ka.”

Dua na tacida yalewa o Vita e tiko e Ivano-Frankivsk. Ena vula o Maji, e toki vei tacina me rawa nira vakaicili e nona vale na tacida era dro yani. E kaya: “Au sega ni okata qori meu vakuai au ena dua na ka. Ia qori e dua na sala au rawa ni vakaraitaka kina na loloma, e vakamarautaki au tale ga. Nida lewe ga ni dua na vuvale.”

E tiko e Habriela e Ternopil na tacida yalewa o Natalia, na watina kei na luvedrau yalewa. Ni tekivu na ivalu ratou sa sega ni cakacaka, ratou sa vakayagataka e levu na ilavo ratou maroroya tu me ratou bula kina. Ia ratou se yalorawarawa ga me ratou vakaicilitaka e dua na tacida yalewa, kei na luvena yalewa e vakaleqai tu na ituvaki ni yagona.

E kaya o Natalia: “Au vakasamataka mai na nona ivakaraitaki e dua na tacida yalewa e Aferika e sega ni levu na ka e taukena. Ia e vakaicilitaki ira e le 14 na tacida ena soqo ni veiwasewase, qai sega ni dua na ka era leqa kina.” E vukei Natalia sara ga na ivakaraitaki qori me vakaliuca na veika me baleti ira eso tale.

Dina nira sotava tiko na tacida e Ukraine na ituvaki dredre, ia era se nuitaki Jiova tiko ga qai “dau veikauaitaki.”—Roma 12:13.