LVIV, Ukraine—E vakadeitaka na valenivolavola ni tabana ni iVakadinadina i Jiova e Ukraine ni a mate e dua na iVakadinadina ena gauna e kacabote kina e dua na gasaukuro ena yasa ni nona motoka. A yaco qo ena siti o Kramatorsk ena tokalau kei Ukraine ena ika17 ni June, 2014. Se sega tale ni dua na iVakadinadina i Jiova e mavoa se mate ena tikoyavavala sa vakavula qo na kena yaco tiko. Ia era sa tokitaki rawa e drau vakacaca na iVakadinadina i Jiova mai na veivanua e yaco tiko kina na leqa ena tokalau kei Ukraine. Era sa lai vakaruru toka ena nodra itikotiko na tacidra iVakadinadina i Jiova.

E yaco tiko na ivalavala kaukaua e Ukraine, ia qori e sega ni tarovi ira na iVakadinadina ena nodra lai wasea vei ira wekadra na itukutuku veivakacegui mai na iVolatabu. Ena imatai kei na ikarua ni macawa ni June 2014, a vakayacori ena tokalau kei Ukraine e vica nodra soqo lelevu na iVakadinadina i Jiova, a sega ni vakilai e keri e dua na tikoyavavala. A rogoci ena soqo qori na ivunau vakaivolatabu kei na vakatasuasua me baleta na bulataki ni ivakavuvuli vakaivolatabu e veisiga. Era tiko ena soqo qo e sivia e 5,200. Era tuvanaka tu na iVakadinadina i Jiova e rauta ni 40 tale na soqo ni veiwasewase me na vakayacori e Ukraine kei Crimea, ena vakamacalataki kina vakaivolatabu na vakacegu ena vakilai ni sa veiliutaki na Matanitu ni Kalou. E namaki mera tiko ena soqo qo e sivia na 165,000 wili kina na le 7,500 mai Crimea.

Gusunivosa:

Veiyasa i Vuravura: J. R. Brown, Valenivolavola ni iTukutuku, talv. +1 718 560 5000

Ukraine: Vasyl Kobel, talv. +38 032 240 9323