LVIV, Ukraine—Era tabili yani na iVakadinadina i Jiova ena ika4-6 ni Julai 2014 e Lviv na tokalau kei Ukraine ni yaco tu na ivalu. Na usutu ni nodra Soqo ni Veiwasewase “Vakaliuca Tiko ga na Matanitu ni Kalou!” Mai sevutaka kina o Anthony Morris na lewe ni iLawalawa Dauvakatulewa ni iVakadinadina i Jiova na itabataba vakavoutaki ni New World Translation of the Holy Scriptures ena vosa vakaUkraine ni gauna qo.

E tuvanaka na valenivolavola ni tabana ni iVakadinadina e kea eso na tikina bibi ni soqo me sema ena vidio ina 8 na siti kei na 62 tale na vanua ena yasana o Donetsk, na vanua sara ga e carubi tu kina na ivalu. O ira na tiko ena soqo kei ira na sema mai era le 82,832 taucoko, era tiko ena valenisarasara e Lviv e le 18,336. Era le 1,068 taucoko na papitaiso.

Mai tini botoilevu na soqo ena imatai ni siga ni vinakati me vagalalataki na valenisarasara ni tukuni ni tiko e kea na gasaukuro. Ena loma ga ni 11 na miniti era vakalala na valenisarasara na le 16,000 qai tomani na soqo ni sa vakadeitaki ni sega ni dina na veivakarerei ya.

O Vasyl Kobel e dua na mata ni iVakadinadina i Jiova e Ukraine e tukuna: “Dua na ka neimami marautaka na kidavaki ira e levu na vulagi ena neimami soqo. Na tiki bibi ni soqo na kena sevutaki na itabataba vakavoutaki ni New World Translation ena vosa vakaUkraine, a sevutaki eliu ena vosa vakaValagi ena Okotova ni 2013. Keimami marautaka me keimami tukuna vei ira na wekai keimami na vosa ni yalayala ni iVolatabu me baleta na veisaututaki ena gauna se bera mai, vakauasivi ni keimami donuya tu qo na tiko yavavala.”

Gusunivosa:

Veiyasa i vuravura: J. R. Brown, Valenivolavola ni iTukutuku, talv. +1 718 560 5000

Ukraine: Vasyl Kobel, talv. +38 032 240 9323