Ena ika26 ni Seviteba 2018, e vakatabui na noda cakacaka na iVakadinadina i Jiova ena siti o “Donetsk People’s Republic” (se DPR). Ni tukuni ena Mataveilewai Cecere nida dau vakavuna na “tiko yavavala.” Ni caka tiko na veilewai e sega mada ga ni veivosaki kei na dua na iVakadinadina i Jiova na mataveilewai, se o koya na dauveibeitaki ena mataveilewai ni kaya ni sega ni dodonu vakalawa na noda cakacaka. Na vakatabui ni noda cakacaka e kea, e muri vinaka kina e dua na ivakarau sa tete totolo sara tiko ena vanua qori, oya na nodra dau vakacacani na iVakadinadina i Jiova.

Ena 2017 e vakatulewataka na Mataveilewai Cecere ena siti qori ni so na noda ivola e vakavuna na “tiko yavavala,” sa qai ca sara kina na kedra ituvaki na tacida ena veivanua e Donetsk kei Luhansk ena tokalau kei Ukraine. Na yabaki tiko ga qori era kau kina vei ira na ovisa e sivia na le 170 na tacida mera lai vakatarogi. E veitaravi ga na nona taura vakaukaua na matanitu na noda Vale ni Soqoni era tu ena veiyasa ni vanua qori. Tekivu mai na ika29 ni Okosita, 2018, sa tauri kina e 16 taucoko na noda Vale ni Soqoni.

Era vakacacani na tacida ena vanua qori ena vuku ni nodra sokalou, ia era nuitaka tiko ga na ‘Kalou e dauveivakabulai.’—Same 18:46.