9 NOVEBA, 2018
UKRAINE
Era Veikauaitaki Qai Duavata na iVakadinadina i Jiova ena Soqo Lavotaki e Ukraine
Ena ika6 ina ika8 ni Julai, 2018 era veikidavaki na iVakadinadina i Jiova e Ukraine vei ira e vica vata na udolu na mataveitacini era gole yani ena soqo lavotaki e caka e Lviv mai Ukraine. E sivia na le 3,300 na vulagi era cavutu mai na ciwa na matanitu era tiko ena soqo qori. E nodra inaki me yaga vei ira na porokaramu e yavutaki vakaivolatabu, e kena ulutaga, “Mo Yaloqaqa”! Era marautaka tale ga nodra veivakacegui na itaukei ni soqo.
E tekivu ena Epereli 2017, na kena vakarautaki na soqo. Oti tale e 15 na vula era bole e levu na tacida mera veivuke ena kena tuvanaki na soqo, kei na nodra kauaitaki na vulagi ena nodra tiko e kea. Era tovolea na tacida eso na ka era kilai kina na kai Ukraine, me vaka na danisi, ivakatagi, kei na kakana ni vanua. E vakarautaki tale ga na dauveivakasarasarataki mera vakasarasarataki ira ena vale ni iyau maroroi, kasela makawa, kei na veiulunivanua e Carpathia. E marautaki duadua nodra veitomani ena cakacaka vakavunau kei ira na mataveitacini e Ukraine.
E vakayacori na soqo ena dua na vanua levu ni sarasara e Lviv, ra qai tiko kina e sivia na le 25,000. E kaburaki eso na ivunau ena 15 tale na valenisarasara, kei na levu na Vale ni Soqoni ena vanua taucoko qori. E sivia na le 125,000 era tiko kina, era papitaiso tale ga e le 1,420.
E kaya o Ivan Riher na mata ena valenivolavola ni tabana e Ukraine: “Dua na ka neimami nanamaki ena soqo bibi qo, keimami rawa tale ga ni kidavaki ira na taci keimami ena so tale na vanua. Keimami marautaka ni keimami lomasavu ni kauaitaki ira na vulagi. Keimami vakila tale ga ni vaqaqacotaki noda duavata, kei na noda yaloqaqa na dausokalou e vuravura raraba.”—Same 133:1.
iWiliwili levu duadua era tiko ena vanua ni sarasara e Lviv, e 25,489.
Era papitaiso e le 1,420, qo e dua vei ira na qase duadua.
Dua vei ira na gone a papitaiso ena soqo lavotaki.
Era cakacaka vakavunau na dautukutuku e kea, kei ira na vulagi mera veisureti ena soqo.
Redetaka na valenivolavola ni tabana na Lviv Opera House ni tiko kina na buturara lelevu. Era marautaka kina na vulagi nodra sarava na danisi, kei na lagasere era kilai kina na kai Ukraine. E qai cava na porokaramu nira lagata na sere, “Na Yacamuni o Jiova.”
Meke tiko o ira na tacida ena Svirzh Castle.
Ni cava na porokaramu, era vakaraitaka na tacida na ivakatakilakila ni nodra loloma vei ira na tacida era gole yani.
Rawa ni o Wilika Tale ga
ITUKUTUKU VOU
iMatai ni Soqo Lavotaki e Georgia
E imatai tale ga ni gauna me vakayacori kina e Georgia e dua na soqo ni kana magiti vakayalo. E laurai kina nodra veikauaitaki na mataveitacini, ra qai vakaraitaka tale ga na nodra itovo vakavanua, kei na kedra volaitukutuku makawa.