Ena ika19 ni Epereli 2019, era sa qai vakananuma tu na tacida e Uzbekistan na mate i Jisu, ni oti e vica vata na yabaki na kena vakatabui.

Era kilai ga vakalawa na iVakadinadina i Jiova e Uzbekistan ena siti o Chirchik, volekati Tashkent. Ena veiyabaki sa oti, era dau cakava lo na tacida ena taudaku kei Chirchik na iVakananumi mera kua ni kila na ovisa. Ena yabaki qo, era sa tukuna na tacida vei ira na ovisa ni na caka tiko na iVakananumi, era sureti tale tu ga. Era veivuke vakalevu na ovisa, era raica tale ga mera taqomaki na tiko ena soqo. Ena so na vanua, era tiko mada ga ena soqo na ovisa.

E vunau ena iVakananumi o Brother Mark Sanderson e dua na lewe ni iLawalawa Dauvakatulewa, ena Vale ni Soqoni e Chirchik, e tiko ena itaba. E vakadewataki tale ga vakaRusia na porokaramu. Era le 781 na tiko kina. E vakayacori tale ga ena Vale ni Soqoni qori e rua na iVakananumi ena yakavi.

E tomani Brother Sanderson ena veisiko qori o Paul Gillies mai na itikotiko liu, kei na rua na tacida tagane mai Esia e Loma. Ratou lai sota kei na so na vakailesilesi ni Tabana ni Lawa kei na tabana e qarava na nodra dodonu na lewenivanua. Ena gauna ni bose, ratou vakamacalataka vinaka sara ga na tacida na veika dina me baleta noda vakabauta kei na isoqosoqo. Eda nuitaka tu ni na levu sara na ka ratou na kila na vakailesilesi me baleta na noda isoqosoqo kei na ka eda vakabauta, me rawa ni vakalawataki na sokalou ena taudaku kei Chirchik, me tara kina na vanua ni sokalou.

Qo e dua na toso se qai laurai ga qo e Uzbekistan, ni caka na iVakananumi kei na nodratou lai bose na tacida kei ira na vakailesilesi. Ena ono na vula sa oti, e sega na vakacaca, vakatauitotogi, se mera vesu na tacida. Ena ika14 ni Me 2018, e kaya na mata ni Uzbekistan i Merika o Mr. Javlon Vakhabov, ni na veisautaka na lawa na palimedi me rawa nira vakalawataki na iVakadinadina i Jiova.

Eda nuitaka ni na vakalougatataka o Jiova na nodra sasaga na tacida e Uzbekistan nira saga tiko ga na ‘bula galala, kei na vakacegu nira qarava mai vu ni lomadra na Kalou, ra qai yalodina kina.’—1 Timoci 2:2.